ગણપતિ બાપ્પાને પ્રાર્થના

  “એ આઈ.... દેવ બાપ્પા આલે!! “ એક સાવ નાનકડા બાળકનો સાદ સંભળાય છે અને ગણપતિબાપ્પાની સુંદર વિશાળ પ્રતિમાઓના ફોટા એક પછી એક સ્ક્રીન પર બદલાય છે આવો એક વિડિયો વોટ્સ એપ પર જોયો અને મુખ પર સ્મિત છવાઈ ગયું! આબાલવૃદ્ધ સૌને ગમતો તહેવાર એટલે ગણેશચતુર્થીથી શરૂ થતો ગણેશોત્સવ... આબાલવૃદ્ધ સૌને ગમતા દેવ ગણપતિબાપ્પાની મૂર્તિની સાર્વજનિક મંડપમાં કે ઘેર પધરામણી કરવાનો અને તેમનું પૂજન કરી ધન્યતા અનુભવવાનો પાવન ઉત્સવ. આ વખતે જો કે કોરોનાના કેરના કારણે સાર્વજનિક મંડપ અને

બાપ્પાની મૂર્તિ ની ઉંચાઈમાં ઘટાડો જોવા મળશે, પણ ભક્તોની બાપ્પા પ્રત્યેની શ્રદ્ધામાં ઓટ નથી આવી. લોકોમાં ગણેશોત્સવ પ્રત્યેનો ઉત્સાહ અને ઉમંગ અકબંધ છે. 

    આ વખતે ઈકો ફ્રેન્ડલી મૂર્તિઓનું ચલણ વધુ જોવા મળશે અને પર્વ બાદ લોકોની ઉજવણીની ખોટી રીતને લીધે ફેલાતા પ્રદૂષણમાં પણ ઘટાડો જોવા મળશે એ મોટો ફાયદો. લોકો સ્થાપના અને વિસર્જન માટે મહારાજની મદદ પણ ઓનલાઇન લેતા જોવા મળશે. વિસર્જનમાં પણ રસ્તાઓ પર ભીડ નહીં હોય અને કૃત્રિમ તળાવ કે પોતપોતાના ઘેર વિસર્જનમાં વધારો જોવા મળશે.

  ગણપતિ બાપ્પા સાચા હ્રદયથી કરેલી પ્રાર્થના ચોક્કસ સાંભળે છે. તો ચાલો આજથી શરૂ થઈ રહેલા આ મંગલ ઉત્સવ દરમ્યાન સૌ સાથે મળી પ્રાર્થના કરીએ કે હે ગણપતિ બાપ્પા.... 

 ~ કોરોનાનો જડમૂળથી જલ્દી જ નાશ કરી દો.

~ અમારું જીવન ફરી પહેલા જેવું નિર્ભય અને સુંદર બનાવી દો, જ્યાં અમે છૂટથી એકબીજા સાથે હળી મળી શકીએ.

~ લોકોના મનમાં લોકડાઉનને લીધે જે નિરાશા, નકારાત્મકતા પ્રવેશી ગયા છે તેનો સમૂળગો નાશ કરી દો. 

~ ઘણાં લોકોના નોકરી ધંધા મંદ કે બંધ પડ્યા છે, તેમને ફરી ધમધમતા કરી દો.

~ અર્થતંત્ર ને જે ખોટ પડી છે તે ભરપાઈ કરી દો.

~ બાળકોની શાળાઓ, યુવાનોની કોલેજો, મોટેરાઓની ઓફિસો ચાલુ કરી દો.

~ બજારો, મોલ, દુકાનો, સભાગૃહો વગેરે ફરી ધમધમતા કરી દો.

~ લોકોની પરિવારજનો સાથે નિકટતા વધી છે, પર્યાવરણ પ્રત્યે સંવેદન શીલતા વધી છે તે કાયમી કરી દો.

~ પ્રદૂષણમાં ઘટાડો થયો છે, સ્વચ્છતામાં વધારો થયો છે તે પણ કાયમી કરી દો.

 સાચા મનથી, સાથે જોડાઈને કરેલી સમૂહ પ્રાર્થનામાં ઘણી તાકાત હોય છે. આવો આપણે સૌ ગણરાયાને સાચા દિલથી ઉપર જણાવેલી પ્રાર્થના કરીએ... એ ચોક્કસ સાંભળશે અને તેને પૂરી કરશે. ગણપતિ બાપ્પા મોરિયા!!!

ગેસ્ટ બ્લોગ : ઈતિહાસમાં એક નવા પ્રકરણનો ઉમેરો

     આ બે હજાર વીસની સાલમાં દેશ અને દુનિયાના માનવીઓએ  ક્યારે ય ધારી ન હતી, એવી ગંભીર ઘટનાએ આકાર ધારણ કર્યો. કોરોના જે વૈદકીય ભાષામાં કોવિડ19 તરીકે ઓળખાય છે, તે વિષાણુએ જગત આખાને હચમચાવી દીધું. વિશ્વના અનેક લોકોના જીવ લીધા આ વાયરસે. બીજા વિશ્વયુધ્ધ દરમિયાન પણ જે ગંભીર પરિસ્થિતિ હતી તેના પ્રમાણમાં વિશેષ સંકટમય સંજોગો આ એકવીસમી સદીમાં જોવા મળ્યા. આજે જે વરિષ્ઠ નાગરિકો હયાત હશે તેઓ સાક્ષી ભાવે સરખામણી કરતાં કહી શકશે, કે આવા દિવસો તો ક્યારે ય જોયા ન હતા. 

          દરેક દેશને તેનો સ્વતંત્ર ઈતિહાસ છે. અઢારમી સદી પછી દેશ અને દુનિયામાં અનેક સંકટોનો પ્રજાએ સામનો કર્યો. ઈતિહાસમાં તેની નોંધ લેવાઈ. અનેક વિષમ સંજોગો ઉતપન્ન થયા. બધુ થાળે પડતાં વર્ષોના વર્ષો પસાર થઈ ગયા. ભારત સહિત અન્ય અનેક રાષ્ટ્રોનો વિકાસ થયો અને તેઓ સમૃધ્ધિની ચરમ સીમાએ પહોંચી ગયા. ભારત આજે એક સંપૂર્ણ વિકસિત તથા સમૃધ્ધ દેશ તરીકે દુનિયાભરમાં પંકાય છે. વિવિધ ક્ષેત્રે આ દેશ પ્રગતિ કરી આત્મ નિર્ભર બન્યો છે, જેની સગર્વ નોંધ લેવી જ રહી. 

    આઝાદીની લડત તો ઘણી જ આકરી હતી, આઝાદ થયા પછી પણ દેશ ઉપર તબક્કા વાર અનેક સંકટોના વાદળ ઝળૂંબ્યા હતા. આંતરિક યુધ્ધો, કુદરતી આફતો, સુનામી આતંકવાદ જેવા બનાવો બન્યા. પ્રજાએ સહન પણ કર્યું, પરંતુ ભારતીય જનની સંકલ્પ શક્તિ તથા આશાવાદી અભિગમને કારણે તેણે હંમેશા વિજય મેળવ્યો છે. જગતના દેશો તેનાથી પરિચિત છે. 

                          વર્તમાન દિવસોમાં જે કઈં બની રહ્યું છે, તેની તો કોઈએ કલ્પના પણ નહી કરી હોય. છેલ્લા સો વરસમાં ક્યારેય ના થયું હોય તેવી વિડંબના માનવજાતને માથે આવે પડી છે. કોરોના જેવા વાયરસે તો બધું જ થંભાવી દીધું છે. માણસ હંમેશા માણસ ભૂખ્યો રહ્યો છે. એકબીજાને મળવું, હળવું ભળવું તે તેનો સહજ સ્વભાવ છે. માણસ માણસ વચ્ચેના સંબધોને કારણે એકમેકને ઘણું શીખવા મળતું, સૌ પોતપોતાના આનંદમાં સહભાગી થતા, પણ આજે તો સોશિયલ ડિસ્ટન્સ  અને લોકડાઉન જેવા શબ્દોનો પરિચય માનવીને પહેલીવાર થયો. એકબીજા વચ્ચે અંતર રાખવું અત્યંત જરૂરી થઈ ગયું. માણસ પોતાના જ ઘરમાં પોતે કેદ થઈ ગયો. 

                           ભૂતકાળમાં વિવિધ આંદોલનો, હડતાળો કે કુદરતી આફતોને લીધે બંધ જેવી પરિસ્થિતિ નિર્માણ પામતી, પણ તે તો માત્ર થોડા સમય માટે. જ્યારે આજે તો ત્રણ - ચાર મહિનાઓ સુધી બધું ગતિ વિહીન હોય તેવો બનાવ પ્રથમવાર બન્યો. જગતની માનવજાતને ભયભીત કરી નાખી આ વૈશ્વિક મહામારીએ. હાલ તો આ રોગની કોઈ દવા નથી, પણ તેનું સંશોધન ચાલે છે. વેક્સિન શોધવાનું  કામ પણ ચાલે છે. 

                          એક સમયે ભારતમાં પ્લેગ જીવલેણ રોગ હતો. આજે તેનો ઉપચાર સરળ છે. પોલીઓના વિષાણુ દેશભરમાં ફેલાયેલા હતા, પરંતુ આજે રસીને કારણે દેશ પોલીઓ મુક્ત છે. આ જ પ્રમાણે દેશ અને દુનિયા કોરોના મુક્ત થશે, તેવી આશા  રાખીએ તો તે અસ્થાને નથી. આજના યુવાનો કાલે વરિષ્ઠની અવસ્થાએ હશે અને આવનારી પેઢીને કોરોના વિષે જણાવશે ત્યારે તેમને તે દંતકથા સમું લાગશે, પણ ઈતિહાસમાં એક નવા પ્રકરણનો ઉમેરો જરૂર થશે. 

                          આશા રાખીએ કે થંભી ગએલા વિશ્વની ગાડી પ્રગતિના પાટા પર ફરી રાબેતા મુજબ દોડતી થાય. 

     - નીતિન વિ મહેતા     

ન્યૂ નોર્મલમાં ગ્રાહક કાળજી, ઈકો ફ્રેન્ડલી ગણપતિ અને એક પુલની પ્રેરણાત્મક વાત

 ગ્રાહકની કાળજી - ક્રેઝી કટ હેર સલૂન

------------------------------------------------

     કોરોનાને કારણે લોકડાઉન જાહેર થયું એ વાતને ચારેક મહિના થયાં અને તેના કારણે અનેક લઘુ તેમજ મધ્યમ કદના ઉદ્યોગો પડી ભાંગ્યા અને જાહેર સેવાઓને પણ તેની ખાસ્સી અસર પહોંચી. આમાં એક ઉદ્યોગ એટલે હજામત સેવા પૂરી પાડતા હેર કટિંગ સલૂન અને ફેશન પાર્લર. કોરોનાને કારણે હેર કટિંગ સલૂન અને ફેશન પાર્લર જાણે બંધ જ પડી ગયા. ત્રણેક મહિનાના લોક ડાઉન બાદ પણ બીજી અનેક નાની મોટી સેવાઓ ફરી શરૂ થયા છતાં લોકોના મનમાં ડર યથાવત હોવાથી હજી હેર કટિંગ સલૂન અને ફેશન પાર્લર  ધમધમતા થવા પામ્યાં નથી. અહીં જેટલી ખુરશી કે સામાન્ય બેઠક હોય તેના પર અનેક લોકો આવીને વારાફરતી બેસે, એક ગ્રાહક જતો રહે પછી એ ખુરશી કે બેઠક સંપૂર્ણ સેનિટાઈઝ ના થાય કે એક ગ્રાહક પર ફરેલો અસ્ત્રો કે બ્લેડ સેનિટાઈઝ કર્યા વગર બીજા ગ્રાહક પર ફરે અને જો કોઈક ગ્રાહક કોરોનાગ્રસ્ત હોય તો બીજા અનેકને તેનો ચેપ લાગે એ ડરથી હેર કટિંગ સલૂન અને ફેશન પાર્લરમાં જતાં લોકો હજી ડરે છે. ત્રણ - ચાર મહિના સુધી ઘણાં લોકોએ વાળ જ કપાવ્યા નથી તો ઘણાં જાતે જ ઘેર પોતાના વાળ કાપી સેટ કરતાં થઈ ગયાં છે! એવામાં મેં મારા ઘર નજીક આવેલા એક હેર કટિંગ સલૂનની ચોકસાઈ અને તેમના દ્વારા કોરોના અંગે સજાગતા રાખી ગ્રાહકો માટે લેવાતા અસામાન્ય અને નોંધનીય પગલાં અંગે સાંભળ્યું. મારા પણ વાળ ઘણાં સમયથી કપાવવાના બાકી હોવાથી એક સાંજે મેં ત્યાંની મુલાકાત લેવાનું નક્કી કર્યું. ફોન કરી સલૂન ખુલ્લું હોવાની ખાતરી કરી લીધા બાદ જઈ પહોંચ્યો 'ક્રેઝી કટ હેર સલૂન'.

   હું જ્યાં રહું છું તે મલાડ પશ્ચિમ ખાતે ભાદરણનગરમાં ખજૂરીયા નગર પાસે રેશનિંગ ઓફિસ નજીક આવેલ આ હેર સલૂન માં ચોખ્ખાઈ આંખે ઉડીને વળગે એવી હતી. ગ્રાહકો ઓછા આવતા હોય તો ચોખ્ખાઈ તો હોય જ એવી દલીલ કરતા હોવ તો અહીં માત્ર આ જ વાત નોંધનીય નહોતી. નાની એવી જગામાં બેઠક, શીશા, સાધન સામગ્રી વગેરે પણ એ રીતે ગોઠવેલા કે અદ્યતન અને સુઘડ જગાએ આવ્યાનો અનુભવ થાય. પગથી ચાંપ દબાવો એટલે ઉપર ગોઠવેલા સેનિટાઈઝરથી હાથમાં પ્રવાહી સેનિટાઈઝરના ટીપાં ઝરે એવું મશીન એક બાજુએ ગોઠવેલું. તેના વડે હાથ સ્વચ્છ કરી બેઠક પર ગોઠવાયો એટલે તરત વાળ કાપનાર યુવાને ભરપૂર માત્રામાં વાયુ સેનિટાઈઝરનો આખા શરીર પર જાણે મારો ચલાવ્યો! સેનિટાઈઝરની સુગંધ સારી હોય એટલે એ અનુભવ પ્રસન્નકારી રહ્યો. ત્યાર બાદ એક જ વાર વાપરી શકાય એવું અર્ધપારદર્શક પહેરણ તેણે મારા શરીર પર ગોઠવ્યું. સામાન્ય રીતે આ પહેરણ બધાં ગ્રાહકો વચ્ચે એક જ હોય છે એટલે કે એક ગ્રાહક જાય એટલે ખંખેરી બીજા ગ્રાહકને પહેરાવવામાં આવે છે પણ અહીં એક જ વાર વાપરી શકાય એવા અર્ધપારદર્શક પહેરણોનો ઢગલો એક ખૂણે પડેલો દેખાયો. વાળ કાપનાર યુવાને માસ્ક અને હાથ મોજા તો પહેર્યા જ હતાં પણ તેણેય સેનિટાઈઝરથી હાથ સ્વચ્છ કર્યા. વાળ કાપતી વખતે પણ સાધનો સેનિટાઈઝર કરેલા હોવાનું માલુમ પડયું, બ્લેડ પણ મારી સામે જ નવી ખોલીને વાપરવામાં આવી. 

 મને ખુશી થઈ એ વિચારી કે આ સલૂનના માલિક આવનાર ગ્રાહકોની સુરક્ષા અને તબિયત અંગે કેટલા સભાન અને સજાગ છે. શ્રેષ્ઠ ગ્રાહક સુવિધા કોને કહેવાય તેનો અહીં અનુભવ થયો. ન્યૂ નોર્મલને નામે ઘણાં પગલાં લેવાતા હોય છે જેમ કે શરીરનું તાપમાન માપવું, મુલાકાતીના નામ, સરનામાની નોંધ લખવી, હેન્ડ સેનિટાઈઝર મૂકવું વગેરે. આ બધું કોરોનાથી બચાવવામાં કેટલું કારગત નિવડી શકે? કોઈ દુકાન, મોલ, ઓફિસ, સલૂન કે પાર્લરમાં એ વાત પર સંપૂર્ણ ધ્યાન અપાય છે કે કઈ રીતે આવનાર મુલાકાતી કદાચ કોરોના વાઇરસના સંપર્કમાં આવ્યો પણ હોય તો તેનાથી તેને મુકત કરી શકાય? મલાડના ક્રેઝી કટ હેર સલૂનમાં મને આ બાબત ની તકેદારી રખાતી હોવાનો અનુભવ થયો, જે ખૂબ ગમ્યું અને વાળ કપાવી લીધા બાદ પ્રસન્ન વદને અને મને મેં ઘેર પાછા ફરવા પ્રયાણ કર્યું.

9920472808  પર સંપર્ક કરી તમે  પણ ક્રેઝી કટ હેર સલૂનની મુલાકાત લઈ શકો છો.

ચોલુટેકા નદી પરના પુલની પ્રેરણાત્મક વાત 

---------------------------------------

થોડા દિવસ અગાઉ એક સંદેશો વોટ્સએપ પર વાઈરલ થયો હતો. લેખક, વક્તા અને લીડરશીપ કોચ એવા પ્રકાશ ઐયર લિખિત આ પ્રેરણાત્મક લેખમાં મધ્ય અમેરિકાના હોન્ડુરાસ શહેરમાં આવેલ ચોલુટેકા નદી પરના પુલની વાત હતી. આ શહેર વંટોળ અને વિષમ આબોહવા માટે જાણીતું છે. તેમાં આવેલી ચોલુટેકા નદીમાં વારેઘડીએ પૂર આવે અને તે વિનાશ નોતરે. આ નદી પર જાપાને અતિ મજબૂત અને ટકાઉ એવો પુલ બાંધ્યો, જે એક ભયાનક વાવાઝોડામાં અડીખમ રહ્યો. પણ એ વાવાઝોડાએ મચાવેલા આતંકને કારણે, નદીના સામસામે છેડે આવેલા કિનારા તરફના, પુલને શહેર સાથે જોડતાં રસ્તા તૂટી ગયાં અને કુદરતી રીતે નદીએ પણ પોતાની દિશા સહેજ બદલી અને હવે તે પુલની નીચેથી નહીં પણ સહેજ આઘે બાજુએથી વહેવા માંડી. પરિણામે દુનિયા આખી દાખલો લઈ શકે એવા બાંધકામના ઉત્તમ નમૂના સમા એ પુલને કુદરતે સાવ નકામો, વ્યર્થ બનાવી દીધો. અહીં શીખવાની વાત એ છે કે તમે ખૂબ મહેનત કરી એક જ ક્ષેત્રમાં અતિ પાવરઘા બનો, પણ જો પરિસ્થિતિ સાથે તાદાત્મ્ય કેળવતા ન શીખો, તો અણધાર્યા સંજોગો તમને ક્યારેક નકામા બનાવી દઈ શકે છે. જરૂર છે લવચીક બનવાની, ફ્લેક્સિબીલીટી કેળવવાની. જે પરિસ્થિતિ ઈશ્વર લાવે એને અનુરૂપ થઈ જીવન જીવતા શીખવાની અને તેમાંથી નવો માર્ગ શોધવાની. પેલી ટટ્ટાર ઝાડ વાળી વાત યાદ આવે છે. જે વૃક્ષ અતિ સખત અને ટટ્ટાર થડ ધરાવતું ઉભું હોય, તે વંટોળમાં ઉખડી ફેંકાય છે. પણ જે વૃક્ષ નરમ થડ ધરાવતું હોય અને સખત હવા સાથે ઝૂકી જતા શીખે એ ટકી જાય છે. આપણો અભિગમ જિદ્દી અને હઠીલો નહીં પણ નમ્ર અને વિષમ પરિસ્થિતિ સ્વીકારી તેમાંથી માર્ગ કાઢી શોધે એવો હોવો જોઈએ. આજે કોરોના એ આપણાં જીવનને ધરમૂળથી બદલી નાંખ્યું છે. ઘણાં લોકોએ નોકરી ધંધા ગુમાવ્યા છે, ઘણાં આર્થિક દૃષ્ટિએ પાયમાલ થઈ ગયાં છે, ઘણાં નિરાશાની ગર્તામાં ધકેલાઈ ગયાં છે તો ઘણાં આત્મહત્યાના કિસ્સાઓ સાંભળવામાં આવે છે. એવામાં ઉપર જણાવેલી વાર્તા અતિ હકારાત્મક અને પ્રેરણાત્મક સંદેશો આપે છે.  જે પરિસ્થિતિ ઈશ્વરે સર્જી છે, સૌએ તેમાંથી માર્ગ કાઢી ટકી રહેતા શીખવાનું છે, નવસર્જન કરતા શીખવાનું છે. 

ઈકો ફ્રેન્ડલી ગ્રીન ગણપતિ 

------------------------

    છેલ્લે એક મજાની વાત. પખવાડિયા પછી 

ગણપતિ બાપાની પધરામણી થવાની છે. આ વખતે આ સાર્વજનિક તહેવાર જુદી જ રીતે ઉજવાશે. મોટા ભાગના લોકો પોતપોતાને ઘેર બાપાની મૂર્તિ લાવશે અને ઉત્સવ પૂરો થયે મૂર્તિનું વિસર્જન પણ જાહેરમાં ગિરદી કરી, ઘોંઘાટ મચાવી દરિયા કિનારાની જગાએ પોતપોતાને ઘેર બાલદીમાં કે નજીકના તળાવ, કૂવા કે કૃત્રિમ જળાશયમાં કરશે. હું કોરોનાના સકંજામાંથી હેમખેમ પાછો ફર્યો છું તે ઈશ્વરની કૃપા વગર શક્ય ન જ બન્યું હોત. આથી ઈશ્વરનો હ્રદયપૂર્વક આભાર વ્યક્ત કરવા માટે હું પણ ગણેશજીની પધરામણી મારે ઘેર કરવાનો છું. ખાસ વાત એ છે કે મેં પહેલી વાર બાપાની મૂર્તિ ઓનલાઇન બુક કરી છે. Myecoganesh.com વેબસાઇટ પરથી. અહીં ત્રણ પ્રકારની મૂર્તિ ઉપલબ્ધ છે - ક્લે માટીની, ઝાડ છોડ ઉગાડવા વપરાતી લાલ માટીની અને કાગળના માવાની. મેં ઝાડ છોડ ઉગાડવા વપરાતી લાલ માટી માંથી બનાવેલી આઠ ઈંચ ઉંચાઈ ની નાનકડી અતિ સુંદર મૂર્તિ પસંદ કરી બુક કરી છે જેની હોમ ડીલીવરી ની હું કાગડોળે રાહ જોઇ રહ્યો છું! આ મૂર્તિ ની વિશેષતા એ છે કે વિસર્જન બાદ તેની બધી માટી હું એક કૂંડામાં ભેગી કરી તેમાં સુંદર એવો કોઈ છોડ વાવીશ અને તેના દ્વારા ગણેશ સદાયે મારા ઘરમાં જ રહેશે, મારી સાથે! 

ગેસ્ટ બ્લોગ - સ્વયં સિધ્ધા

       ઓલ ઈન્ડિયા વિમેન્સ  કોન્ફરન્સ, જોગેશ્વરી  શાખાની  કમીટીમાં હું કાર્યરત છું. દર વર્ષે ૮ મી માર્ચે અમારી સંસ્થામાં મહિલા દિનની ઉજવણી કરવામાં આવે છે. આ દિવસે એવી ત્રણ મહિલાઓનું સન્માન કરીએ છીએ જેઓ સેવાભાવી કાર્ય કરતાં હોય અથવા જેમણે કોઈક ક્ષેત્રમાં પુરુષાર્થ કરી સફળતા  પ્રાપ્ત કરી હોય.અલગ અલગ ક્ષેત્ર જેમ કે પર્યાવરણ, સ્પોર્ટસ, કલા.... જેવા વિવિધ વિષયોમાંથી એક વિષય નક્કી કરી, એમાં પોતાનું યોગદાન આપનારી, સ્વયંને સિદ્ધ કરનારી મહિલાઓને અમે અવોર્ડ તથા સર્ટીફિકેટ આપીતેમનું સન્માન કરીએ છીએ.  આ  સંદર્ભમાં એક એવી પ્રતિભાને મળવાનું થયું જેઓએ વાદ્ય સંગીતના ક્ષેત્રે ખુબ જ નામના મેળવી છે . મહિલાદિન નિમિત્તે આ વર્ષે અમારી સંસ્થાએ 

એમનું સન્માન કર્યું. તબલા વાદનની વિશારદની પરીક્ષા ભલે નથી આપી પણ એ કક્ષાનું જ્ઞાન ધરાવે છે. તેમણે કેટલાય અવોર્ડસ ,મેડલ્સ  અંકે કર્યા છે. રાષ્ટ્રપતિજીનાં હસ્તે પણ અવોર્ડર્સના હકદાર બન્યા છે. ૫૦ મિનિટમાં ૫૦ વાજીંત્રવાદન કરીને લિમ્કા બુકમાં પણ તેઓ સ્થાન પામ્યા છે. આ બધી પ્રસિદ્ધિ - સફળતા એટલા માટે વિશિષ્ટ બની જાય છે કે આ સ્વયં સિદ્ધા યોગીતાજી તાંબે દિવ્યાંગ છે. પ્રજ્ઞાચક્ષુ .

                   જન્મનાં થોડા જ સમયમાં એક આંખ ગુમાવી અને જ્યારે દસમા ધોરણમાં હતાં ત્યારે બાથરુમમાં પડી જતાં બીજી આંખ પણ ગુમાવી. મગજને ઈજા પહોંચી હોવાથી યાદશકિત પર પણ અસર થઈ. તેમ છતાં આ બધી પરિસ્થિતિનો હિંમતભેર સામનો કર્યો. દસમાની પરીક્ષા તો પાસ કરી જ પણ ત્યાર બાદ એમ. એ. ના સ્નાતક પણ થયા. તબલા વગાડવાની કળા કદાચ ઈશ્વરદત્ત હતી. નાનપણથી જ તેઓ તબલાં વગાડતાં. સદનસીબે યોગીતાજીને ગુરુ પણ સરસ મળ્યા. તબલા સાથે તેઓ ઢોલ, ઢોલકી, ડફ બધું જ સરસ વગાડે છે. (ગુરુજીની સંમતિથી).

                આજે યોગીતાજી પોતે તાલીમ લે છે અને સાથે એક શાળામાં વિદ્યાર્થીઓને સંગીતનું શિક્ષણ આપવા પણ જાય છે. તેમના ઘરે છોકરાઓ તબલા શીખવા આવે છે  જેમાં બે છોકરાઓની આર્થિક સ્થિતિ સારી ન હોવાથી તેઓને ફી લીધા વગર મફત શીખવાડે છે. યોગીતાજી સંગીતના કાર્યક્રમો પણ રજૂ કરે છે. કાર્યક્રમ આપવા જાય ત્યારે તબલાની સાથે તેઓ એક મેજીક બેગ અવશ્ય રાખે છે જેમાં નાળિયેરની કાચલી , નાના મોટા પથ્થર, મગ - ચણા જેવા કઠોળ,પાનું જેવી અલગ અલગ વસ્તુઓ રાખે છે , જેમાંથી વિવિધ સંગીત, જુદા જુદા અવાજોનું સર્જન કરે છે. આ એક એમની  વિશિષ્ટ કળા છે. આ ઉપરાંત એ વાંચનનો પણ શોખ ધરાવે છે. બ્રેઇલ લિપિમાં ધાર્મિક તેમજ ઈતર વાંચન કરતાં હોય છે. પુસ્તકોનું તેમની પાસે વિશાળ કલેકશન છે.

               ઈશ્વર માનવીને એકાદ ઇન્દ્રિયથી વંચિત રાખે તો બીજી  ઇન્દ્રિયોને  કદાચ વધુ સતેજ કરી દે છે. યોગીતાજી માટે એમની શારિરીક મર્યાદા અવરોધરૂપ નથી. બીજા પર નિર્ભર રહેવું એમને પસંદ નથી. તેમના માતાપિતાએ પણ તેમનો ઉછેર સામાન્ય સંતાનની જેમ જ કર્યો છે. યોગીતાજીનું વ્યક્તિત્વ એકદમ આનંદી - પ્રસન્નમિજાજ. માનવી પર જરા એવી તકલીફ આવે તો તે અસ્વસ્થ થઈ જાય, ઈશ્વરને દોષ દે પણ યોગીતાજીને મળીએ તો એવો અનુભવ થાય કે જે પણ પરિસ્થિતિ છે તેનો તેમણે સહજતાથી સ્વીકાર કરી  લીધો છે. ક્યાંય કોઈ ફરિયાદ નહી, કોઈ નિરાશા નહી . ખરેખર સંપૂર્ણ માનવી પણ એમની જીવન પ્રત્યેના હકારાત્મક અભિગમથી પ્રેરણા પામે એવું પ્રતિભાવંત, દિવ્યાંગ વ્યક્તિત્વ!                     

       - નેહલ દલાલ

વિડિયો કોન્ફરન્સિંગ માટેની સ્વદેશી એપ 'પ્રોફિસમ કોલ' અને એ બનાવનાર સિદ્ધાંત વેકરીયા સાથેની યાદગાર મુલાકાત

     પ્રધાનમંત્રી શ્રી નરેન્દ્ર મોદીની આત્મનિર્ભર ભારતની હાકલથી પ્રેરાઈને અમરેલી જિલ્લાના બગસરા તાલુકાના રફાળા ગામના ઉત્સાહી અને ખંતીલા યુવાન સિદ્ધાંત વેકરીયા દ્વારા પોતાના મિલન સાવલિયા અને કુમાશ શાહ નામના બે મિત્રોની મદદથી વિડિયો કોન્ફરન્સ માટેની તેમજ ઓનલાઇન મીટિંગ માટેની એક મોબાઈલ એપ તૈયાર કરાઈ છે જેનું નામ છે 'પ્રોફિસમ કોલ'.

   કોરોના લોકડાઉન શરૂ થયું ત્યારથી આપણે મિત્રો, સગાંસંબંધીઓ સાથે વિડિયો કોલ કરવા ઓનલાઇન મીટિંગ એપ્સ વાપરતા થયા છીએ. વર્ક ફ્રોમ હોમ શક્ય બનાવવા માટે કોર્પોરેટ જગતે પણ વિડિયો કોન્ફરન્સિંગ તેમજ ઓનલાઇન મીટિંગ માટે પ્રચલિત એવી ઝૂમ, વેબએક્સ, માઇક્રોસોફ્ટ ટીમ જેવી અનેક એપ્સ અપનાવી છે. તેવામાં આપણાં ગુજરાતના ત્રણ ઉદ્યોગ સાહસિક યુવાનોએ માત્ર ચૌદેક દિવસના ટૂંકા સમયમાં તૈયાર કરેલી સંપૂર્ણ ભારતીય એપ 'પ્રોફિસમ કોલ' એક અતિ સરાહનીય અને આવકારદાયક પગલું છે. આ એપ્લિકેશન બનાવવામાં તેમને ધ સ્ટાર્ટઅપ ઈન્ડિયા નેટવર્ક કમ્યુનિટીનો સહયોગ સાંપડયો છે.

     થોડાં સમય અગાઉ ઝૂમ એપમાં સુરક્ષાને લઈને પ્રશ્નો ઉભા થયા હતાં જેથી સરકારને પરિપત્ર જાહેર કરી આ એપનો ઉપયોગ મર્યાદિત કરવાની ફરજ પડી હતી જેનું મૂળ કારણ એન્ડ ટુ એન્ડ એનક્રિપ્શનનો અભાવ હતું. 'પ્રોફિસમ કોલ' એપમાં આ અંગે ખાસ ધ્યાન અપાયું છે જેથી આપના કોલ્સ અને મિટિંગ વગેરેનો ડેટા સુરક્ષિત રહે. આમ પણ આ એપ સંપૂર્ણપણે ભારતીય હોવાથી આપણો ડેટા વિદેશમાં લીક થવાનો ભય નથી. એક વિડિયો કોન્ફરન્સિંગ તેમજ ઓનલાઇન મીટિંગ માટે જોઈતી મોબાઈલ એપ માટે જરૂરી એવા બધાં જ ફીચર્સ 'પ્રોફિસમ કોલ'માં હાજર છે એટલું જ નહીં એમાં સતત નવા નવા ફીચર્સ ઉમેરાતાં રહે છે.

  એન્ડ્રોઇડ અને આઈ. ઓ. એસ. બન્ને પ્લેટફોર્મ માટે 'પ્રોફિસમ કોલ' એપ ગૂગલ પ્લે સ્ટોર પરથી ફ્રી ડાઉનલોડ કરી શકાય છે. પ્રથમ સો જેટલી મીટિંગ ફ્રી છે અને ત્યારબાદ વ્યાજબી દરે તેનું પ્રીમિયમ વર્ઝન અપગ્રેડ થઈ શકે છે જેનો ઉપયોગ કરી તમે સ્વદેશી ટેકનોલોજીને પ્રોત્સાહન આપી શકો છો.

   હવે આ એપ્લિકેશન બનાવનાર સિદ્ધાંત અને તેના પિતા સાથે થયેલ મુલાકાત વિશે થોડી સ્વાનુભવની વાત કરું. બગસરાના ગોલ્ડન વિલેજ તરીકે પ્રખ્યાત બનેલા રફાળા ગામના વતની તેમજ સુરતના સુવિખ્યાત સામાજિક કાર્યકર અને વિશ્વ ગુજરાતી સમાજના પ્રમુખ સવજીભાઈ વેકરીયા ખૂબ જાણીતું નામ છે અને તેમની મહેમાનગતીનું સૌભાગ્ય થોડાં વર્ષો અગાઉ મારા પપ્પા તેમના મિત્ર હોવાને લીધે પ્રાપ્ત થયું હતું. શ્રીમંત સાથે ભારોભાર સજ્જન અને નમ્ર હોવું કોને કહેવાય એ જાણવા માટે આ બાપ- દીકરાની જોડી ને મળવું પડે. મને અતિ પ્રેમથી વર્ષો અગાઉ આ મહાનુભાવે આપેલ આલિંગન અને અતિ પ્રેમ અને ભાવથી કરાવેલ ભોજન આજે પણ મારી સ્મૃતિમાં અકબંધ છે. સિદ્ધાંતના મમ્મીએ મને અને સિદ્ધાંતને સાથે જ બેસાડી ભારે આગ્રહપૂર્વક સ્વાદિષ્ટ ઘેર બનાવેલ ભોજનનો આસ્વાદ કરાવ્યો હતો. જમીન પર પલાંઠીવાળી સિદ્ધાંત સાથે કરેલ એ જમણ ખરેખર પેલી 'સૂરતનું જમણ અને કાશીનું મરણ' કહેવત સાર્થક કરનાર બની રહ્યું અને એ મને સદાય યાદ રહેશે.

    ભોજન બાદ સવજીભાઈ સાથે ઘણી શીખવાલાયક જ્ઞાનવર્ધક અને સિદ્ધાંત સાથે ઘણી સર્જનાત્મકતા ભરેલી વાતો કરી હતી. પછી પ્રેમથી સિદ્ધાંતે મને પોતાના બાઇક પર બેસાડી સુરતના જોવાલાયક સ્થળોની સફર કરાવી હતી.

       સવજીભાઈ વેકરિયાએ જ્યારે તેમના એ ઘરમાં ગૃહ પ્રવેશ કર્યો હતો, જેની મેં મુલાકાત લીધી હતી, ત્યારે અનેક દિવ્યાંગ બાળકોને પ્રેમથી એ ઘેર ભોજન કરાવ્યું હતું. તેમના માતા પિતાને અંજલિ આપવા તેમના વતનના ગામ રફાળા ને દત્તક લઈ તેની કાયાપલટ કરી નાખી અને એ ગામની જે પણ દીકરીના લગ્ન થાય તેને અનેક ભેટ સાથે સુવર્ણ પત્રના કન્યાદાનની અનોખી પહેલ તેમણે કરી હતી. આવી મહાન વ્યક્તિનો વારસો જાળવતા સિદ્ધાંતે  'પ્રોફિસમ કોલ' એપ બનાવી આત્મનિર્ભર ભારતની દિશામાં અતિ મહત્ત્વનું પ્રશંસનીય પગલું ભર્યું છે. તેને ભવ્ય સફળતા મળે એવી ખેવના રાખીએ.

Profism Call is available for free download on Google Play. More info on their website : call.profism.com

ન્યૂ નોર્મલ

     'ન્યૂ નોર્મલ' આ શબ્દ પાછલા થોડાં સમયથી ખૂબ સાંભળવા મળે છે. એનો અનુવાદ થાય 'નવું સાધારણ' અર્થાત્ પહેલા સામાન્ય સ્થિતી કંઈક જુદી હતી, હવે કોરોના એ તે સમૂળગી બદલી નાખી છે અને તે આપણે સૌએ સ્વીકારવી જ રહી.
  મુંબઈ શહેરની, તેની લાઇફ લાઇન ગણાતી મુંબઈ લોકલ (રેલવે ટ્રેન) વગર કલ્પના કરવી જ અશક્ય જણાતી. જ્યારે છેલ્લા લગભગ ત્રણ મહિનાથી મુંબઈ લોકલ સાવ બંધ સમાન છે. પહેલા એ અડધો કલાક મોડી પડે તો હાહાકાર મચી જતો, બીજે દિવસે છાપામાં એ ઘટના, સમાચાર તરીકે સ્થાન પામતી. જ્યારે આજે કદાચ એ ફરી ફૂલ ફોર્મમાં ચાલુ થઈ જાય તો પણ હાલ પૂરતી તો તેમાં કચડી નાખનારી ગિરદી જોવા મળે કે કેમ એ અંગે શંકા થાય છે.
     અહીં છાપાની વાત કરી, એ છાપા વગર આપણી સવાર નહોતી પડતી. આજે ઘણી સોસાયટીઓમાં, ઘણાં વિસ્તારોમાં છાપા વાળાને કોરોનાના ભયને કારણે પ્રવેશ જ નથી એટલે ઘણાં એ મહિનાઓથી છાપું જોયું પણ નહીં હોય!
    જૂન મહિનામાં બાળકોની સ્કૂલ ઉનાળાના વેકેશન બાદ ખૂલે અને નવું શૈક્ષણિક વર્ષ શરૂ થાય. આ વખતે સ્કૂલો ખૂલી જ નથી. ઓનલાઇન વર્ગો શરૂ થયા છે. માતાપિતા માટે સ્કૂલ ખૂલતા પહેલા એક ઓરીએંટેશન પ્રોગ્રામ રાખવામાં આવે છે, તે પણ આ વર્ષે ઓનલાઇન યોજાયો અને સ્કૂલના પ્રિન્સિપાલ મેડમે પણ આ શબ્દ 'ન્યૂ નોર્મલ' નો ઘણી વાર પ્રયોગ કર્યો. આપણે બાળકોને મોબાઈલ અને લેપટોપ જેવા ઉપકરણોથી દૂર રાખવા મથતા, પણ હવે એ તેમની પણ દૈનિક જરૂરિયાત સમા બની ગયા છે. સ્કૂલ જ મોબાઈલ અથવા લેપટોપ પર એટેન્ડ કરવી પડે તો બાળકોને આ ઉપકરણોથી દૂર કેમ રાખી શકાય. આ બની ગયું છે હવે ન્યૂ નોર્મલ!
  મારી ઓફિસની વાત કરું તો અમારી કંપનીમાં ડેટા સિક્યોરિટી અતિ અતિ મહત્ત્વની હોઈ, સ્વપ્નમાં પણ વિચાર્યું નહોતું કે ઘેરથી કામ કરી શકાય. કોઈ એકલ દોકલ મિત્ર ક્યારેક ઘેરથી કામ કરવાની વાત કરતો ત્યારે તેની કંપની કેટલી 'લિબરલ' છે અને તેમની એચ. આર. પોલિસી કેટલી એમ્પ્લોયી ફ્રેન્ડલી છે એવો વિચાર આવતો. જ્યારે આજે હું છેલ્લાં બે મહિનાથી એક પણ દિવસ ઓફિસ ગયો નથી. ઘેર બેઠાં જ 'વર્ક ફ્રોમ હોમ' ના 'નવા સાધારણ' સાથે અમારી કંપનીના મોટા ભાગના લોકો રોજ કામ કરે છે. આ ન્યૂ નોર્મલ જો કે તેના આગવા ગેર ફાયદા પણ ઘણાં ધરાવે છે, પણ તેની ચર્ચા અત્યારે નથી માંડવી. દર ત્રણ મહિને ઓફિસમાં 'ટાઉનહોલ' નામે એક કાર્યક્રમ યોજાય જેમાં અમારી કંપનીના અધ્યક્ષ બધાં એમ્પ્લોયીઝને એક સાથે સંબોધે અને કંપનીના નવા અભિયાન, તેના છેલ્લા ત્રણ મહિનાના કામકાજ - પ્રગતિ વગેરે અંગે માહિતી આપે. આ કાર્યક્રમ પણ આ વખતે યોજાયો વેબિનાર (ઓનલાઇન સેમિનાર) દ્વારા. તેમાં પણ 'ન્યૂ નોર્મલ' શબ્દ અનેક વાર કાને અથડાયો. વર્ક ફ્રોમ હોમ સાથે ઓનલાઇન મીટિંગ, કોનફરન્સ કોલ, ઝૂમ, ચેટ, વિડિયો કોલ આ બધા શબ્દો પણ હવે ન્યૂ નોર્મલના ભાગ સમા, સામાન્ય બની ચૂક્યા છે.
   ઓફિસમાં અઠવાડિયામાં બે વાર એમ્પ્લોયી માટે યોગના વર્ગો થતાં. એ પણ હવે ઓનલાઇન યોજાય છે. મારી દીકરી નમ્યા ભરતનાટ્યમ શીખે છે, તે પણ ઓનલાઇન! હિતાર્થ તો હજી સાડા ત્રણ વર્ષનો છે અને તેના નર્સરી વર્ગો પણ ઓનલાઇન થવાના હતાં, પણ સરકારની મંજૂરી ન મળતા, તેનું ભણવાનું વોટ્સ એપ ગ્રુપ પર શેર થતાં બાળગીતો અને અન્ય વિડિયો દ્વારા ચાલુ થયું છે. મારી પત્ની અમી પણ હવે કેટલીક વાનગીઓ ગૂગલ પર કે યૂ ટયૂબ પર વિડિયો જોઈ બનાવતી થઈ ગઈ છે જે ખાવાની મજા પડે છે!
   તંદુરસ્તીને લગતા કેટલાક નિયમો પણ હવે આપણે ન્યૂ નોર્મલ તરીકે સ્વીકારી લીધા છે જેમ કે માસ્ક પહેર્યા વગર ઘરની બહાર ન નીકળવું. અરે, હવે તો જુનો કોઈ ગ્રુપ ફોટો જોઈને પણ વિચાર આવે છે કે આટલાં બધાં લોકો એક સાથે, આટલા નજીક અને તે પણ માસ્ક વગર?!! સાબુથી હાથ ધોવા, સેનિટાઇઝરનો ભરપૂર ઉપયોગ, શેક હેન્ડ ની જગાએ નમસ્તે આ બધાં નિયમો પણ 'ન્યૂ નોર્મલ' છે અને તે આપણે અપનાવી લઈએ એમાં જ ભલાઈ છે.
     કોરોનાએ આપણાં જીવનમાં ધર મૂળથી પરિવર્તન આણી દીધું છે આ એક નક્કર હકીકત છે. ન્યૂ નોર્મલ શબ્દ પણ હવે નોર્મલ બની ગયો છે તેને સ્વીકારવો જ રહ્યો.

ગેસ્ટ બ્લોગ - ઓસ્ટ્રેલિયા પ્રવાસ - “ગ્રેટ બેરિયર રીફ” (કુદરતી અજાયબી)

      કાંગારૂનો દેશ,ઓસ્ટ્રેલિયા એટલે દિલને મંત્રમુગ્ધ કરતાં પ્રાકૃતિક સૌંદર્ય અને દિમાગ પર વશીકરણ જમાવતી અનેક સાહસિક પ્રવૃત્તિઓને માણવાનો દેશ.
આમ તો ઓસ્ટ્રેલિયામાં અમે અનેક સ્થળની મુલાકાત લેવાનાં હતાં, વિવિધ પ્રવૃતિઓ માણવાનાં હતાં જેમાંથી પેંગવિન પરેડ અને કાંગારૂ એન્કાઉન્ટરનાં અનુભવ લેવાં માટે પણ દિલ ઉત્સાહિત હતું, પરંતુ મને  “ગ્રેટ બેરિયર રીફ” જઈને સ્નોર્ક્લિંગની મજા માણવાની વિશેષ ઉત્કંઠા હતી.  એટલે જ જ્યારે અમારાં નવ જણનો કાફલો ઓસ્ટ્રેલિયાનાં પશ્ચિમ કિનારે સ્થિત ‘કેર્ન્સ’ તરફ વળ્યો ત્યારે મારું મન દરિયાનાં મોજાંની જેમ ઉછાળા મારવા માંડયું.
કેર્ન્સ શહેર એટલે ગ્રેટ બેરિયર રીફ પહોંચવનાં અનેક પ્રવેશદ્વારમાંનું એક દ્વાર અને ગ્રેટ બેરિયર રીફ એટ્લે ક્વીંસલેંડનાં કાંઠાથી પેસિફિક સાગરની પશ્ચિમી ધાર સુધી ૨300 કિ.મી.નાં વિસ્તારમાં ફેલાયેલી, કુદરતી અજાયબી. સમુદ્રનાં તળિયે ધબકતી , વિશ્વની સૌથી વિશાળ જીવંત દરિયાઈ સૃષ્ટિ. 3000 ખડક અને ૯00 ખંડિય ટાપુની શૃંખલા ધરાવતું, સૌથી મોટું પરવાળું; જ્યાં નિતાંતપણે વિહરતા નાનાં-મોટા કદનાં રંગબેરંગી દરિયાઈ જીવોને અને વનસ્પતિઓને સમીપથી જોવાનો લહાવો લઈ શકાય. એને માટે સમુદ્રની સપાટી પર તરતાં તરતાં જ દરિયાઈ જીવન નિહાળવું (સ્નોર્ક્લિંગ) કે પછી ગોતાખોરની જેમ ઊંડી ડૂબકી લગાવી (સ્કુબા ડાઈવિંગ ) એમની લગોલગ જવાનો રોમાંચક અનુભવ લેવો; બંને શક્ય છે.
સ્કૂબા ડાઈવિંગ માટે જરૂરી અનુભવ ન હોવાથી અને સ્વિમિંગનો અપાર શોખ હોવાને કારણે મેં સ્નોર્ક્લિંગ કરવાનું જ નક્કી કર્યું હતું. એને માટે ત્યાં જતી ‘રીફ એક્સપિરિયન્સ’ નામની ક્રૂઝનું “વન ડે ટુર” નું ઓનલાઈન બુકિંગ અમે ઈન્ડિયાથી અગાઉ જ કરાવી લીધું હતું.
ક્રૂઝ પર સવારે ૭.30 થી સાંજે ૪.30 સુધી વિવિધ પ્રકારનાં અનુભવ માણવાંનાં હતાં, જેને માટે આગોતરી તૈયારી રૂપે અમે અમારી બેગ્સમાં ટુવાલ, નેપકિન અને એક જોડી કપડાં ઉપરાંત  હેટ, સનગ્લાસ અને ખાસ કરીને મોટી માત્રામાં સનસ્ક્રીન લોશન લીધું હતું. (ઓસ્ટ્રેલિયામાં ઓઝોન વાયુનું સ્તર ખૂબ નીચું હોવાથી ખુલ્લી જગ્યાએ સૂરજનો તાપ વધુ આકરો લાગે જેથી શરીર પર અને ખાસ કરીને ચહેરા પર સનસ્ક્રીન લોશન વારંવાર લગાડવું પડે) ક્રૂઝ ઉપર ચા-કોફી-જ્યુસ-ઠંડાપીણાં-વેજીટેરિયન નાસ્તો-લંચ-સ્નેક્સ બધું જ મળવાનું હોવાથી ખાણી-પીણીની ચિંતા નહોતી.
એ ઉપરાંત સ્કૂબા હૉય કે સ્નોર્ક્લિંગ; લાયક્રાનો વોટર પ્રૂફ સ્વિમિંગ સૂટ , પાણીની નીચે શ્વાસ લેવાં માટે ઑક્સીજન માસ્ક , પાણીમાં માછલીની જેમ તરવા માટે પગમાં પહેરવાનાં ફિન્સ (જે માત્ર પાણીમાં ડૂબકી મારતાં પહેલાં જ પહેરાવાનાં હોય ) અને અન્ય જરૂરી સાધન સામગ્રી પણ ત્યાંથી જ મળવાનાં હતાં. સવારે ૭ વાગે ‘રીફ એક્સપિરિયન્સ’ ક્રૂઝ પર પહોંચીને ત્યાંની વ્યવસ્થા નજોરોનજર નિહાળી તો ખાતરી થઈ ગઈ કે આજનો દિવસ ઓસ્ટ્રેલિયા પ્રવાસ નો સૌથી આનંદદાયક અને યાદગાર દિવસ બનવાનો છે. અહીં ઉપસ્થિત દરેક વ્યક્તિની આંખોમાંથી દરિયાઈ સૃષ્ટિમાં પ્રવેશવાનો ઇંતેજાર ડોકાતો હતો.
ક્રૂઝ પર સુરક્ષાકર્મીઓ, ગોતાખોર, ફોટોગ્રાફર , ડોક્ટર, પ્રશિક્ષક , ગાઈડ અને મદદનીશ; બધું મળીને બાર જણાંની નિષ્ણાત તરાકુ ટીમ હાજર હતી જે વર્ષોથી સમુદ્રનાં પાણી સાથે પનારો પાડતી આવી હોય. સવારે ૭.30 થી ૧૧:30 દરમ્યાન નાસ્તો, સમુદ્ર તળે વસતાં જળચર જીવનની રસપ્રદ માહિતી, અન્ય પ્રારંભિક માહિતી, સુરક્ષા સૂચનાં, નિયમો જાણ્યાં બાદ સ્વાસ્થ્ય સંબંધી ફોર્મ ભરતાં સુધીમાં અમારી ક્રૂઝ  ગ્રેટ બેરિયર રીફની સમીપ પહોંચી ચૂકી હતી.
સૂચના અનુસાર સમુદ્રમાં જનાર બધી વ્યક્તિઓ સ્વીમિંગ સૂટ પહેરીને તૈયાર થઇ ગઈ હતી. દરેક જણાંએ થોડી વાર માટે માસ્ક પહેરીને નાક ને બદલે મોઢે થી શ્વાસ લેવાની પ્રેક્ટિસ કરી. અને અંતે એ સમય આવી ગયો જેને માણવાં હું ક્યારની તલસી રહી હતી. મેં ક્રૂઝ પર ભાડે થી મળતો વિડીયો કૅમેરો ખરીધ્યો હતો જેથી પાણીમાં તરતાં તરતાં દરિયાઈ સૃષ્ટિની ફિલ્મ ઉતારી શકાય. સ્નોર્ક્લિંગ કરનારાની ટીમ સાથે હું તૂતક પરથી નીચે જઈને સમુદ્રનાં પાણીની લગોલગ સ્થિત થયેલાં બોર્ડ પર બેસી ગઈ. પગમાં ફીન્સ અને  માથે નળીવાળા માસ્ક સાથે એક હાથ કેમેરા પર અને  ગાઈડે સૂચવ્યાં પ્રમાણે બીજો  હાથ પાણીમાં સતત હાલક ડોલક થઈ રહેલી ગોળ રિંગ પર મૂક્યો અને એ સાથે જ હું ખેંચાઇ સમુદ્રની અફાટ જળરાશીમાં. ક્રૂઝ સાથે દોરડા થી બંધાયેલી રીંગની આગળની બાજુ હતો અમારો ગાઈડ અને બીજી બાજુ હું અને મારાં જ પરિવારનાં બીજા બે સદસ્યો.
હજી તો કશું સમજીએ એ પહેલાં તો લગભગ ૨ કી.મી. જેટલું દૂર તણાઇ ગયાં. અને અચાનક જાણે કે મારાં શ્વાસ થંભી ગયાં. મને લાગ્યું કે હું મોઢેથી શ્વાસ લેવાનું ભૂલી રહી છું. શ્વાસ લેવાં માટે નાક અને મોઢાં વચ્ચે યુદ્ધ છેડાયું હતું અને એ યુદ્ધમાં વિજયી થવું અતિ સાહસનું કામ હતું, પણ પળવારમાં અચાનક જ સઘળું વિસરાઈ ગયું. ગાઈડ અમને થોડો વધુ ઊંડે ખેંચી ગયો હતો, જ્યાં નીચે જોતાં જ મન પ્રસન્ન થઈ ગયું.
આહા ! સ્ફટિક જેવાં સ્વચ્છ અને પારદર્શી નીલ જળમાં નિરાંતે લહેરાઈ રહેલાં ભાતભાતનાં વેલાં અને વનસ્પતિઓ. જાજમની જેમ દૂર દૂર સુધી ફેલાયેલી લાલ, લીલી, પીળી અને જાંબલી રંગની લીલ. જાજમ પર પકડદાવ રમતી હોય એમ દોડાદોડ કરતી રંગબેરંગી નાની નાની માછલીઓનું મોટું ઝૂંડ. એમની મસ્તી પર પહેરો ભરી રહી હોય એમ આસપાસ ઘૂમરાતી મધ્યમ કદની લાલ અને કાળી માછલીઓ. એ બધાં પર પોતાનો ધાક જમાવતી હોય એમ વટથી તરી રહેલી મોટી મોટી ગોલ્ડન માછલીઓ. લીલાં છોડવાઓ પર હીંચકાં ખાઈ રહેલી અનેક સ્ટારફિશ અને જેલીફિશ. અને દૂર ખડક પર બેસીને બધો તાલ તમાશો જોતી હોય ચૂપચાપ બેસેલી ટાઈગર ફિશ.
એવું લાગ્યું જાણે દરિયાનાં આંગણામાં માછલીઓએ મસ્તી મહોત્સવનું આયોજન કર્યું હોય જેમાં મહેમાન બનીને આવ્યાં હોય લીલા ચકચકતી કાયા ધરાવતાં કાચબા અને અન્ય અનેક પ્રકારનાં જળચર જીવો. દરિયાઈ સૃષ્ટિની મોહક શોભા જોઈને હું એટલી બધી મુગ્ધ થઈ ગઈ કે કેમેરો એમની પર સરખી રીતે ફોકસ કરવાનું જ ચૂકી ગઈ, જેની જાણ મને પહેલા રાઉન્ડ પછી બોર્ડ પર પાછા ફર્યા બાદ થઈ. પરંતુ કોઈ અફસોસ નહોતો. મનનાં કેમેરામાં આખી ફિલ્મ ઉતરી ગઈ હતી. એટલે જ બીજા રાઉન્ડમાં મેં કેમેરો લીધો જ નહીં જેથી દરિયાઈ સૃષ્ટિનાં અજરચભર્યા સૌંદર્યને મનભરીને માણી શકાય.
બીજો રાઉન્ડ ધાર્યા કરતાં પણ વધુ લાભદાયી નિવડ્યો. અમારો ગાઈડ ઊંડે ડૂબકી મારીને સ્ટારફિશને પોતાની હથેળી પર મૂકીને લઈ આવ્યો. સ્ટારફિશને સ્પર્શ કરવાનો મોકો મળ્યો તો સમજાયું કે દૂરથી નાજૂક દેખાતી સ્ટારફિશની ચામડી પ્રમાણમાં કેટલી કડક છે. સાચે જ, ઈશ્વરે નાના મોટા સર્વ જીવોની રક્ષાની જોગવાઈ કરી છે.
બીજા રાઉન્ડ પછી સમુદ્ર પોતિકો લાગવા લાગ્યો. પહેલાં રાઉન્ડ વખતે શ્વાસ લેવાં માટે અનેક વાર નાક અને મોઢાં વચ્ચે યુદ્ધ મંડાયું હતું , એ પણ હવે થાળે પડવાં લાગ્યું હતું. એટલે જ બીજાં ચાર રાઉન્ડ તો એટલી સહજતાથી થયાં જાણે હું રોજ જ સ્નોર્ક્લિંગ કરતી હોઉં. કેમેરામાં અદભૂત દ્રશ્યો ઝડપવાની તમન્ના પણ પૂરી થઈ. સમુદ્રનાં ઊંડાણમાં નિર્ભિકપણે તરવાની સાક્ષી પૂરતો હોય એવો પ્રોફેશનલ ફોટો પણ પડાવ્યો. અને દિવસને અંતે ક્રૂઝ પર હાજર બધાં પ્રવાસીઓ સાથે યાદગાર ફોટો પણ પડાવ્યો.
સ્નોર્કલિંગનો અતિ રોમાંચક અને સાહસપૂર્ણ અનુભવ માણ્યાં બાદ , રાત્રે હોટેલમાં બેસીને અમે સૌ પરિવારજનો પોતપોતાનાં અનુભવ વર્ણવી રહ્યાં હતાં ત્યારે અમને સમજાયું કે અનુભવ ભલે બધાનાં વેગળા હતાં, પણ બધાંનાં મનમાં એક જ વિચાર રમતો હતો; “ડર કે આગે જીત હૈ”. 
                                            - નીતા રેશમિયા