ગો - ગો ટુ – ગોવા ! (ભાગ - ૧)

ગોવા એટલે બીચ,બીયર અને બિકિની આવો અભિપ્રાય મારા ઓફિસના મિત્રોએ વ્યક્ત કર્યો જ્યારે મેં તેમને જણાવ્યું કે હું મારા પરીવારને લઈને ચાર દિવસના મિનિ-વેકેશન માટે ગોવા જઈ રહ્યો છું. બીજો એક અભિપ્રાય એવો પણ સાંભળવા મળ્યો કે અમારા જેવા શાકાહારી પરીવારને ત્યાં મોટે ભાગે બિન-શાકાહારી આહાર આરોગતા રાજ્યમાં ભારે તકલીફ પડશે. પણ મને ખુશી છે કે મારી આ ગોવા યાત્રા સુખદ રહી અને મારા પરીવારજનોએ પણ એ ખુબ માણી.

કોઈ પણ અજાણી જગાએ જતા પહેલા રીસર્ચ તો કરવી જ પડે એ પણ તમે પરીવાર સાથે જઈ રહ્યાં હોવ અને એ પણ કોઈ પેકેજ ટૂર દ્વારા નહિ અને તમારી મેળે સ્વતંત્ર રીતે.જો કે મને હવે આ રીતે ફરવાની જાણે આદત પડી ગઈ છે.થોડું-ઘણું સંશોધન કરી અજાણી ભોમકા ખેડવાની!

ગોવા ભારતનું જ એક રાજ્ય છે અને તેની સુંદરતા ફિલ્મોમાં જોયેલી અને એ વિશે થોડું ઘણું સાંભળેલું પણ જાતે ત્યાં જવાનો રોમાંચ તો હતો જ. ટ્રેનની ટિકિટો એકાદ મહિના પહેલા તપાસ કરવા છતાં પ્રાપ્ય નહોતી એટલે થોડી ઘણી વેબસાઈટ્સ ચેક કરી બેસ્ટ અવેલેબલ ફ્લાઈટ્સ બુક કરી.  પાંચ વર્ષના બાળકની પણ વિમાનમાં તો આખી જ ટિકીટની કિંમત ચૂકવવી પડે એ થોડું આકરૂં લાગે પણ એકાદ મહિના પહેલા બુક કરવાને કારણે રીઝનેબલ ભાવમાં છ ટિકીટ બુક કરી લીધી. વિમાનનો પ્રવાસ એટલે વિમાનનો પ્રવાસ! એની મજા કંઈક જુદી જ હોય!માત્ર એક કલાક જેટલા સમયમાં ગોવા એરપોર્ટ પહોંચી જવાય!

ગોવા પહોંચતા જ જી.ટી.ડી.સી.(ગોવા ટૂરીઝમ ડેવલપમેન્ટ કોર્પોરેશન) ના એરપોર્ટ પર આવેલા કાઉન્ટર પર જઈ મનીષા બેનર્જીને મળ્યો જેની સાથે અગાઉ  કાર માટે વાત કરી રાખી હતી. જી.ટી.ડી.સી. ગોવામાં ફરવા અને રહેવા માટેની ઘણા સારા સાધન-સુવિધાઓ પૂરા પાડે છે. તેમની વેબસાઈટ પર મેં તેમના દ્વારા ઓફર કરાતા પેક્જીસની માહિતી મેળવી હતી તેના ભેગો જ મને મનીષાજીનો નંબર મળ્યો હતો અને મારી સાથે વાતચીત કર્યા બાદ તેઓ પોતે મેનેજર હોવા છતાં ખુદ ડ્રાઈવ કરી મને પરીવાર સહીત અમારા ગંતવ્ય સ્થાને પહોંચાડવા તૈયાર થયા હતા. ગોવામાં તમે પોતે ડ્રાઈવ કરતા હોવ તો ડ્રાઈવર વગર  માત્ર કાર કે બાઈક સહેલાઈથી ભાડે મળી રહે. પણ મારે ડ્રાઈવીંગની પળોજણમાં પડ્યા વગર આ નવા રાજ્યને માણવું હતું આથી મેં ડ્રાઈવર સાથે વાહન ભાડે કરવાનું નક્કી કર્યું હતું. અમે સાંજે સવા પાંચે ગોવા એરપોર્ટ પર ઉતર્યાં એટલે અંધારૂ થવાને થોડી જ વાર હતી. મેં મનીષાજી ને કહી રાખ્યું હતું કે એરપોર્ટથી પાંત્રીસેક કિલોમીટર દૂર ઉત્તર ગોવાના પોર્વોરીમ ગામે પહોંચતા પહેલાં અમને એરપોર્ટની આસપાસ સારા ફરવા લાયક સ્થળોની સફર કરાવી દે જેથી પ્રથમ દિવસે પણ સમયના સદુપયોગ સાથે કોઈક નવી જગાઓ જોવાનો સંતોષ થાય.

આથી  મનીષાજી સૌ પ્રથમ અમને એરપોર્ટ નજીક આવેલા બોગમાલો બીચ પર લઈ ગયાં. સમી સાંજે કોઈ પણ દરીયા-કીનારે ફરવાની મજા જ અલગ હોય છે એમાંયે આ તો દરીયાકીનારાઓ માટે પ્રસિદ્ધ એવા ગોવાનો દરીયાકાંઠો!  મન પ્રસન્નતા અનુભવી રહ્યું. ત્યાં થોડો સમય પસાર કરી અમે માર્ગમાં આવતા એક માછલીઘર ગયાં. મુંબઈના કરોડો રૂપિયા ખર્ચ્યા બાદ નવીનીકરણ પામેલા તારાપોરવાલા એક્વેરીયમ કરતાં અનેક ગણું સારું હતું ગોવાનું એ 'Abyss Marine Fish Aquarium'. અહિં દરીયાઈ જળજીવોનું ખુબ સરસ રંગબેરંગી વૈવિધ્ય માણવા મળ્યું. જેને કાપો તો કપાયેલા ભાગમાંથી નવી માછલી પેદા થઈ જાય એવી રંગબેરંગી તારામાછલી (સ્ટારફીશ), પીરાન્હા, લકી ફીશ, અરાપમા, સાપ જેવી ઈલ માછલી, એન્જેલ ફીશ, ગાર ફીશ, માથે મોટો ફોલ્લો ધરાવતી ફ્લાવર હોર્ન ફીશ, કેટફીશ, રેડ ઓસ્કાર, રેડ પેરોટ, પૂંછડીના કરંટ જેવા ઝટકા સાથે પ્રાણ પંખેરૂં ઉડાડી શકવાની ક્ષમતા ધરાવતી સ્ટીંગ રે માછલી, લાંબી મૂછો ધરાવતા લોબસ્ટર (જીંગા માછલી), કરચલા, કાચબા વગેરે અનેક જળજીવો ખુબ નજીકથી જોવાની ખુબ મજા આવી. 

આ જગા વ્યવસ્થિત જાળવણી કરાય તો ભારતના શ્રેષ્ઠ માછલી ઘરોમાં ચોક્કસ સ્થાન પામે એટલા વૈવિધ્ય ધરાવતા જળજીવો અહિ મોજૂદ છે. સાથે સરપ્રાઈઝ પેકેજ એટલે અડીને જ આવેલું હોરર હાઉસ! અંદર પ્રવેશતા જ તમારા માથા ઉપર અચાનક આવી પડતા કે સૂતેલી સ્થિતીમાંથી સફાળા બેઠા થઈ જતાં મડદા, ભૂતો, ચૂડેલો, પિશાચો અને રૂંવાડા ઉભા કરી દેતા બિહામણા અવાજો ભલભલાનાં હાંજા ગગડાવી દે! મને આ ભયાનક રસ માણવાની પણ ખુબ મજા આવી!

એ પછી મનીષાજી સાથે વાતચીતનો દોર શરૂ થયો. ગોવામાં ભલે ખ્રિસ્તીઓની વસ્તી વધુ હશે એમ લાગતું હોય પણ અહિ મોટા પાયે હિન્દુઓ વસે છે.ખ્રિસ્તીઓ છે એમાંના પણ મોટા ભાગના વટલાયેલા એટલે તેઓ ઘણી હિન્દુ જીવનશૈલીથી જીવે છે. અહિ ઘણાં મંદીરો છે અને તરતા જુગારખાના(કસીનો)પણ! આ અને આવી અનેક મજેદાર વાતો મનીષાજી એ જણાવી. દોઢેક કલાકની મુસાફરીમાં એમણે ગોવા વિષે, ત્યાંની સંસ્કૃતિ વિષે, ત્યાંના લોકજીવન અને અન્ય ફરવા લાયક સ્થળો વિશે ખુબ ઉપયોગી એવી અઢળક માહિતી આપી. જી.ટી.ડી.સી. વુમન એન્ત્રેપ્રેન્યોર્શીપને ખુબ મહત્વ આપતી હોઈ એવા ખાસ પેકેજીસ ઓફર કરે છે જે મહિલાઓ દ્વારા ચલાવાતી ટેક્સી પૂરી પાડતા હોય. પોતાની ટીચર તરીકેની કારકિર્દી ત્યજી એમ.બી.એ. કરી એટલે જ મનીષાજી જી.ટી.ડી.સી. તરફ આકર્ષયા અને ત્રણેક વર્ષમાં જ ત્યાં મેનેજર જેવી સારી પદ સુધી પહોંચી ગયા છે. નવા રાજ્યમાં જઈ ત્યાંના લોકોને હળોમળો એ પણ એક મજેદાર વાત છે અને તેમની પાસેથી તમે ઘણું શિખી શકો છો. મૂળ દિલ્હીના પંજાબી એવા મનીષાજી બંગાળી વરને પરણી દસકાથી ગોવામાં જ રહે છે, કોંકણી ખુબ સારી રીતે બોલી શકે છે અને ગુજરાતી પણ સમજી શકે છે! તેમણે અમને સહી સલામત અમારા પહેલા મુકામના સ્થાને પહોંચાડી દીધા - ફર્નાન્ડીસ ગેસ્ટ હાઉસ.

(ક્રમશ:)

ગેસ્ટ બ્લોગ : સાત પગલાં

                                                              - રોહિત  કાપડિયા

પ્રિય આત્મીયજન,

   નમસ્કાર.અફાટ રણમાં એકાદ ગુલાબનું ફૂલ ખીલે તો રણને કોઈ ફર્ક ન પડે, પણ એક વાત ચોક્કસ છે કે એ ગુલાબની આસપાસનો વિસ્તાર જરૂરથી મહેકી ઉઠે.તેવી જ રીતે સામાન્યતાના વહેણમાં તણાતાં વિશાળ જનસમુદાયથી અળગા પડી થોડાક પરિવર્તનની કેડીના પથિક બંને તો  બીજો કોઈ મોટો ફર્ક ન પડે પણ એક વાત તો નક્કી છે કે હવામાં બદલાવ તો જરૂર આવે અને આપણે તો આશા રાખવાની કે આ બદલાવ વધુ ને વધુ વિસ્તૃત થાય.

પરિવર્તનની કેડી પર આગેકુચ કરતાં પહેલાં ફ્રાન્સિસ કાર્ડીનલનો એક સુંદર વિચાર-------

‘ પ્રાર્થના એવી રીતે કરો કે જાણે બધાંનો આધાર ઈશ્વર પર છે અને કામ એવી રીતે કરો કે જાણે બધાંનો આધાર તમારી પર છે.’    અને હવે સાત નાનકડા પગલાં --------

૧.કામમાં યાંત્રિકતાને સ્થાને જીવંતતા લાવીએ.

૨. દિવસમાં માત્ર પંદર મિનિટ આપણે સ્વની સાથે વિતાવીએ.

૩. કાંટામાંથી ગુલાબ સુધી પહોંચવાનો પ્રયત્ન કરીએ.

૪.’જ્યાં શાંતિ ત્યાં સ્વર્ગ ‘ આપણે અશાંતિનું નિમિત ન બનીએ.

૫. દેશ વિશેની નકારાત્મક વાતોને બદલે જે પણ સકારાત્મક છે તેનો પ્રચાર કરીએ.

૬. કોઈના પતનમાં નહિ પણ ઉત્થાનમાં જ આનંદ માણીએ.

૭.પરિવર્તનનો સ્વીકાર કરીએ.

- રોહિત  કાપડિયા

પૂછતા નર પંડિત

         ઘણી વાર કોઈ અજાણી જગાએ ગયા હોઈએ અને પાકું સરનામું હોય છતાં જયાં પહોંચવાનુ હોય એ જગા મળતી ના હોય ત્યારે શું કરવું જોઇએ? કોઇને પૂછવું જોઇએ! ઘણા લોકો પૂછવામાં ગરાસ લૂંટાઈ જવાનો હોય એમ નાનમ અનુભવે છે. આવા લોકો પૂછવાની જગાએ કલાકો સુધી ભટકયા કરે છે,હેરાન થાય છે અને પસ્તાય છે.

         કોઈ પણ વિષય ને લગતી ગમે તે  માહિતી મેળવવા ગૂગલ નામનું અમોઘ શસ્ત્ર આજે ઇન્ટરનેટના યુગમાં આપણી પાસે હાથવગુ છે.કોઈ જાણીતી વ્યક્તિ કે પશુ કે વસ્તુનું નામ ખબર હોય અને તેની તસવીર જોવી હોય તો ગૂગલ બાબા હાજર! કોઈ પણ જગાની થોડી ઘણી માહિતી હોય અને વિસ્તાર પૂર્વકની માહિતી જોઇતી હોય તો ગૂગલ સર્ચબોક્સમાં એક-બે શબ્દો નાખો અને તમારી સામે એ વિષયને લગતી સઘળી માહિતીનો ખડકલો તે સમાવી લેતી વેબસાઈટ્સ લિન્કસ્ સ્વરૂપે હાજર ! અજાણી જગાએ જવું છે અને કોઈને પૂછવું ન હોય તો ગૂગલ મેપ્સ હોય તો તમારો બેડો પાર! ચાલતા,બસ કે પોતે ડ્રાઈવ કરીને જવા ઇચ્છતા હોવ એ દરેક વિકલ્પ માટે તમને નિર્દેશ મળી રહેશે! માત્ર શરૂ કરવાના છો ત્યાંથી ગંતવ્ય સ્થાનની માહિતી ગૂગલમાં ટાઈપ કરી દો અને નકશો, તે સ્થળની બીજી પણ ઘણી ઉપયોગી માહિતી સહિત તૈયાર!

         એ સિવાય અન્ય એક અતિ જ્ઞાનવર્ધક અને મજેદાર વેબસાઈટ વિશે મારી એક જુનિયર કલીગે મને જણાવ્યું અને એ મને એટલી ગમી કે તેના વિશે માહિતી તમારા સૌ વાચકમિત્રો સાથે શેર કરવાનું નક્કી કર્યું.આ વેબસાઈટ એટલે Quora.com આ વેબસાઈટ એક પ્રશ્નોત્તરીની ખાસ વેબસાઈટ છે જેના પર તમે ગમે તે વિશય પર,ગમે તે પ્રશ્ન પૂછી શકો છો. આ વેબસાઈટની ટેગ લાઈન છે The best answer to any question એ મુજબ તમને જે જે વાચકોને જાણ હોય એ સૌ પોતપોતાની રીતે ઉત્તર આપશે અને તમને તમારા પ્રશ્નના ચોક્કસ અનેક દ્રષ્ટીકોણ ધરાવતા જવાબો મળશે. તમને પોતાને કોઈ પ્રશ્ન ન પૂછવો હોય તો માત્ર જ્ઞાન મેળવવાના આશયથી પણ આ વેબસાઈટની મુલાકાત લેવી ખુબ ફાયદાકારક સાબિત થશે.

          આ વેબસાઈટ પર Feeds નામે વિષયો વર્ગીકૃત કરેલા હોય છે જેમકે પ્રાણીઓ, પૃથ્વી, પ્રવાસન, આરોગ્ય વર્ધક ખોરાક, સ્ટાર્ટ અપ્સ વગેરે વગેરે. તમે જ્યારે લોગ ઈન કરો ત્યારે કયા વિષય પરના પ્રશ્નો ટ્રેન્ડ થઈ રહ્યા છે અર્થાત સૌથી વધુ ચર્ચાઈ રહ્યા છે તેની પણ એક યાદી વેબસાઈટના તમારા મેન પેજ પર જોવા મળશે દા.ત. સેન્ટ્રલ પેરીસમાં આતંકવાદી હૂમલો, સ્પેક્ટર, ધ વોકીંગ ડેડ સીઝન - ૬ એપિસોડ -૫ વગેરે. તમે જે પ્રમાણેના પસંદગીના વિષયો જણાવ્યા હોય તે વિષયના પ્રશ્નો તમારા મેન પેજ પર લોગ ઇન કર્યા બાદ તમને જોવા મળે. તમારે રોજ લોગ ઇન કરી વેબ સાઈટ પર ન જવું હોય તો પાંચ-સાત પ્રશ્નોત્તરનું લિસ્ટ તમને તમારા ઇમેલ પર ડાઈજેસ્ટ સ્વરૂપે રોજ મેળવવાનો વિકલ્પ પણ ખરો. મને તો આ વેબસાઈટ ખુબ ગમી. મારે થોડા સમય અગાઉ એક જગાએ વક્તવ્ય આપવા જવાનુ હતું તે વિષય થોડો અઘરો હતો.મેં તે વિષયને લગતા પ્રશ્નો સર્ચ કર્યા અને આ વેબસાઈટ પર મને તે પ્રશ્નના અન્યોએ આપેલા ઉત્તર વાચી સારી એવી સામગ્રી મારા વક્તવ્ય માટે મળી રહી.

           કેટલાક પ્રશ્નો સાવ ફાલતુ પણ હોય તો કેટલાક વળી મનોરંજક પણ! તમારે કોઈના પ્રશ્નનો જવાબ આપવો હોય તો એની પણ સુવિધા ખરી. ઘણાં પ્રશ્નોનાં ઉત્તરો નિષ્ણાતો દ્વારા પણ અપાતા હોય છે અને આવા જવાબો સાથે ખાસ એ પ્રકારની માહિતી પણ જોવા મળે કે આ જવાબ 'એકસ્પર્ટ' દ્વારા અપાયો છે.
ગૂગલ જેવું એક સર્ચ બોક્સ મેન પેજ પર જ્યાં તમને કોઈ પ્રશ્ન મૂંઝવતો હોય તે વિશેના બે-ચાર શબ્દો ટાઈપ કરો અને તે શબ્દો ના આધારે અત્યાર સુધી પૂછાયેલા બધા પ્રશ્નોની અને તેના જવાબોની લિન્ક્સ ધરાવતી યાદી તમારી સામે હાજર! પ્રશ્ન પાછોપૂછવાની પણ સુવિધા અને પ્રશ્નોત્તરી ને અંતે તે જ વિષયને લગતા અન્ય પ્રશ્નોનું પણ લિસ્ટ આપવામાં આવે જેથી એ વિષય પરની વધુ માહિતી તમે એ પ્રશ્નોની લિન્ક ક્લીક કરી મેળવી શકો.
         
           બીજા પણ અનેક ફીચર્સ મોજૂદ છે આ વેબસાઈટ પર જેની ચર્ચા માટે આ એક બ્લોગ ઓછો પડે! મારી ભલામણ છે એક વાર તો આ રસપ્રદ વેબસાઈટની મુલાકાત લેજો જ !પૂછતા નર પંડીત કહેવત કંઈ એમનેમ થોડી જ પ્રચલિત થઈ હશે?

            છેલ્લે આ વેબસાઈટ પર વાંચેલા કેટલાક પ્રશ્નોની યાદી :
•How can I make myself get out of bed more quickly?
•How long would the earth be habitable without any humans?
•In India, do young CEOs of top startups receive warning calls from dons or police or politicians demanding money?
•How do they deal with them?
•Why do husband and wife sleep together every night in the same bed? (આ પ્રશ્ન ના પણ ૭ જવાબો આપ્યા છે અન્ય યુઝર્સે!)
•Indian startups like OLA, Zomato, Flipkart & MakeMyTrip are running at a loss despite being in 5th year of operations, yet they get huge funding. Why? What is the long term strategy in terms of revenue? How does this benefit the investors & founders?
•What happens when a police dog gets too old to perform its duty? Does it stay with its person?
•If I dig a tunnel through the Earth and jump in, do I end up on the other side or in the center of it?
•Who is the luckiest person on Earth?

જવાબો વાંચવા Quora.com પર જવાની તસદી લેવી પડશે!