Translate

રવિવાર, 31 જુલાઈ, 2016

ફ્રાન્સ-સ્વીત્ઝર્લેન્ડની પ્રથમ વિદેશ યાત્રા (ભાગ - ૪)

ફ્રાન્સ - પેરીસથી સ્વિત્ઝરલેન્ડની રોડ ટ્રીપ આઠસો-એક કિલોમીટરનું અંતર નવેક કલાકમાં કાપીને કરવાની મજા આવી. હાઈવે પર અમુક અંતર પછી ટ્રાફીક પણ ઓછો હતો. ગાડી સો-એકસો દસની ઝડપે ભૌમિક હંકારી રહ્યો હતો. ટોમટોમ નામના જી.પી.એસ. ડીવાઈસથી ડ્રાઈવિંગ માટે આગળના માર્ગ અને દિશાના નિર્દેશ અનુસરતા અને નેહા તેમજ મારા દ્વારા મોબાઈલ પર વગાડાઈ રહેલ અવનવા હિન્દી-અંગ્રેજી ગીતોની મજા માણતા માણતા ભૌમિક ગાડી હંકારી રહ્યો હતો. રસ્તાની બંને બાજુએ હરીયાળા ખેતરો, પવનચક્કીઓ વગેરે જોતા જોતા પાંચ-છ કલાક પસાર થઈ ગયાં અને પછી શરૂ થયો ગ્રામ્ય વિસ્તાર. અહિ જુદાજ પ્રકારના યુરોપીય ઘરો, દેવળો અને જનજીવનની ઝાંખી જોવા મળી. માણસો ખુબ ઓછા નજરે ચડતા. ખાલીખમ રસ્તા પર પણ લાલ સિગ્નલ આવે એટલે ભૌમિક અને અન્ય વાહનચાલકો અચૂક પોતાના વાહન થંભાવી સિગ્નલ લીલું થયાની રાહ જુએ અને એ લીલુ થયા બાદ જ આગળ વધે. (જ્યારે અહિ ભારત-મુંબઈમાં આજે જ આ બ્લોગ લખતી વેળાએ સમાચાર વાંચ્યા કે સરકારે દ્વિચક્રી વાહનો ધરાવનારાઓની સુરક્ષા માટે, હેલ્મેટ પહેરનારાઓને જ પેટ્રોલ વેચવાના પ્રસ્તાવ સામે બળવો કરાશે!)
ઠેર ઠેર, અલગ અલગ દિશાઓમાં કયા ગામ કે શહેર તરફ જઈ શકાશે તેના અટપટા નામ દર્શાવતા મલ્ટીપલ એરોસ ધરાવતા સાઈનપોસ્ટ્સ ઉભા કરાયેલા જોવા મળતા હતાં. લીલાછમ ખેતરોમાં શિંગડા વગરની હ્રુષ્ટપુષ્ટ ગાયો કે ઘેટા-બકરા દ્રષ્યમાન થતા હતા. ક્યાંક વાંકાચૂંકા તો ક્યાંક સીધા, ઉંચાનીચા સ્વચ્છ રસ્તાઓ પર બીજા એકાદ-બે કલાક પસાર કર્યા બાદ રસ્તાની બંને બાજુએ પહાડો દેખાવાની શરૂઆત થઈ ગઈ.એક મોટાં નીલા આસમાની રંગનું પાણી ધરાવતા જળાશયને નિહાળીને પણ મનને અનેરો આનંદ પ્રાપ્ત થઈ રહ્યો હતો. થોડા વધુ આગળ પહોંચ્યા એટલે પહાડો પર આછો આછો બરફ દેખાવાની શરૂઆત થઈ જે હવે અમે અમારી મંઝીલની નજીક હોવાની ચાડી ખાતો હતો!


ફ્રાન્સ અને સ્વીત્ઝરલેન્ડની સરહદ પાસે સ્વીસ પોલીસે અમારી ગાડી રોકી. કાળા યુનિફોર્મધારી ગોરા ગોરા ફૂટડા બે યુવાન પોલીસ અને એક સુંદર યુવતિ પોલીસે અમારી ગાડી અને અમારા પાસપોર્ટ્સ તપાસ્યાં.મારો પાસપોર્ટ નજીકની કેબીનમાં વધુ તપાસાર્થે લઈ જવાયો.અહિ ફરી એક વાર મને થોડો અજ્ઞાત એવો ડર લાગ્યો પણ થોડી જ મિનિટોમાં પોલીસ યુવતિ મારો પાસપોર્ટ લઈ પાછી ફરી, તેણે ભૌમિક સાથે ફ્રેન્ચ ભાષામાં થોડી વાતચીત કરી અને સસ્મિત અમને તેમના દેશમાં આગળ વધવા જણાવ્યું.
સ્વીત્ઝરલેન્ડ ની વાત જ કંઈક નિરાળી હતી! પહાડો વચ્ચે આવેલો આ એક અતિ સુંદર દેશ છે જ્યાં પ્રાકૃતિક સૌંદર્ય ખોબલે ને ખોબલે વેરાયેલું જોવા મળે! રસ્તો કાપતી વેળાએ મને ઠેર ઠેર ભારતના મનાલીની યાદ આવતી હતી. અહિ પણ એક નદી અમારી સાથે સાથે રસ્તાની સમાંતરે વહી રહી હતી.લીલા પહાડોમાં વચ્ચે વચ્ચે ક્યાંક એકલદોકલ તો ક્યાંક ઝૂમખામાં લાકડાના બનેલા નાનકડા સુંદર ઘરો દ્રષ્યમાન થતા હતાં.
રસ્તામાં એક પટ્ટો એવો આવ્યો જ્યારે રસ્તાની માત્ર ડાબી બાજુએ એક ખાસ પ્રકારના અતિ લાંબા ખાસ પ્રકારના વૃક્ષો હારબંધ જોવા મળ્યા જેમના ઘટાદાર પાન એક ખાસ ત્રિકોણાકાર ભાતમાં એક જ બાજુએ ઉગેલા જોવા મળ્યાં. જાણે આ વૃક્ષો માર્ગની એક બાજુએ ઉભા રહી,તેમના વિશિષ્ટ આકારે ઢળેલા પર્ણોની છટાથી વટેમાર્ગુઓનું સ્વાગત ન કરતા હોય! સ્વીત્ઝરલેન્ડમાં પછી તો ઠેર ઠેર જોવા મળેલા ઉંચા પાઈન-દેવદારના ઝાડ નહોતા એ.
છેલ્લો અડધો કલાક પહાડ પરના સાપ જેવા વાંકાચૂકા રસ્તે થઈ સ્વીત્ઝરલેન્ડમાં વધુ આગળ પહોંચ્યા ત્યારે સાંજ પડી ગઈ હતી, આઠેક વાગી ગયા હતાં,પણ અહિ તો અગાઉ જણાવ્યા મુજબ હજી ભારતમાં સાંજના પાંચ વાગ્યા હોય એવું વાતાવરણ હતું.અમે મ્યુન્સ્ટર નામના ગામમાં એક હોમસ્ટેની સુવિધા ધરાવતું ઘર અમારા બે દિવસના મુકામ માટે ભાડે રાખ્યું હતું. સ્વીસના જ વતની એવા માર્થા નામના સુંદર,જાજરમાન અને પ્રેમાળ વૃદ્ધા આ કાષ્ઠના બનેલા ઘરના માલકણ હતા.
ઘર લાકડાનું એટલે રખે એમ સમજતા કે ઝૂંપડા જેવું ઘર હશે. એને બંગલો કહેવું વધારે યોગ્ય ગણાશે. અલબત્ત માર્થા મેડમના આ સુંદર ઘરની આસપાસ અન્ય ઘણાં-બધાં ઘર લાકડાના જ બનેલા હતાં. અહિ બરફ ખુબ પડતો હોવાથી આ પ્રકારના તેમાં ટકી શકે એવા જ ઘર બનાવવામાં આવે, અમુક સમય બાદ લાકડાનો રંગ કાળાશ પડતો તપખીરિયો થઈ જાય અને ઘરની દિવાલોને અનેરો સુંદર ઓપ આપે. દરેક ઘરની બહાર આંગણામાં ટ્યુલીપનાં લાલ- પીળાં , ઓર્કીડના જાંબલી કે અન્ય અતિ સુંદર મનમોહી નાજુક વિવિધ રંગી ફૂલોના કૂંડા કે ક્યારા અચૂક દેખાય. કેટલાક ઘરોની બહાર આ નાનકડા બગીચામાં માટીના સાત વહેંતિયાઓ કે પરી કે પ્રાણી કે વાર્તાના પાત્રોના માટીના રંગબેરંગી રમકડાં પણ ખાસ રીતે ગોઠવીને મૂકેલાં જોવા મળે,કેટલાક ઘરોનાં આંગણામાં નાનકડા મરૂન રંગનાં પાંદડા અને સફેદ ફૂલ ધરાવતાં અતિ સુંદર ઝાડ જોવા મળે જે તમને પરીકથામાં વાંચેલ આદર્શ સુંદર ઘરની યાદ અપાવે! વિન્ડ-ચાઈમ્સ કે ફાનસ કે અન્ય સુશોભનની કોઈક વસ્તુ પણ બારીમાં કે છાપરે ચોક્કસ નજરે પડે. દરેક ઘરનાં આંગણે મોંઘા ભાવની અને સુંદર એવી 'પોશ' ગાડી પણ અચૂક જોવા મળે!
માર્થા મેડમના ઘરમાં પ્રવેશ્યાં એટલે દિલ ખુશ થઈ ગયું તેમાંની અત્યાધુનિક સુવિધાઓ જોઇને. મોડ્યુલર કિચન, દરેક રૂમમાં હીટર, હોલમાં મોટું ડાઈનિંગ ટેબલ અને ખુરશીઓ સાથે માથે લટકતા સુંદર લેમ્પ શેડ્સ અને ટેબલ પર નાનકડી ફૂલદાની જેમાં ઘરના આંગણાના બાગમાંથી જ ચૂંટેલા નાનકડા સુંદર નાજુક પુષ્પો,, ડીશવોશર, રેફ્રિજરેટર,બાથરૂમમાં હેન્ડશાવર,ગીઝર અને મોંઘી કટલરી,ઓવન આ બધું માર્થા મેડમે અમને ઉત્સાહથી બતાવ્યું અને તેમના વપરાશ માટેના જરૂરી નિર્દેશ આપ્યાં. ત્રણ સુંદર કાષ્ઠની જ દિવાલો તેમજ ફ્લોરીંગ ધરાવતાં સુંદર ઓરડા, તેમાંથી બહારના સુંદર દ્રષ્યો દેખાડતી ચોરસ બારીઓ, દરેક રૂમમાં એસ્થેટીક લેમ્પ્સ, ફર્નિચર આ બધું અમારે બે દિવસ વાપરવાનું હતું, એ વિચારે એટલી બધી ખુશી અનુભવાઈ રહી હતી કે એ અહિ કદાચ શબ્દોમાં નહિ વર્ણવી શકાય! સ્વીત્ઝર્લેન્ડ જેટલું સુંદર હતું એટલું જ સુંદર હતું માર્થા મેડમનું એ ઘર જેમાં અમે અગાઉ નિયત કર્યા મુજબ બે નહિ, ત્રણ દિવસ રહ્યાં અને એ ત્રણ દિવસમાં જે મજા માણી છે તેના સુંદર અનુભવની વાત આવતા સપ્તાહે!

[આ બ્લોગપોસ્ટની સુંદર તસવીરો તમે   આ લિન્ક ક્લિક કરી જોઈ શકશો.]


 (ક્રમશ:)

રવિવાર, 24 જુલાઈ, 2016

ફ્રાન્સ-સ્વીત્ઝર્લેન્ડની પ્રથમ વિદેશ યાત્રા (ભાગ - 3)

સૌથી મોટો ફરક ભારત અને અન્ય કેટલાક યુરોપીય દેશો વચ્ચે હોય તો એ છે સાંજના સમયે અજવાળાનો. આપણે ત્યાં શિયાળો હોય,ઉનાળો હોય કે ચોમાસુ,સાંજે સાત-સાડા સાત સુધી અંધારૂ થઈ ગયું હોય, પણ ફ્રાન્સ અને સ્વિત્ઝરલેન્ડમાં રાતે નવ વાગે પણ ભારતમાં  સાડા-પાંચ છ વાગે હોય એવું અજવાળું જોવા મળે.
હું, નેહા અને ભૌમિક સાથે પેરીસની ઓળખના પર્યાય સમા ગણાતા એફીલ ટાવર પહોંચ્યો ત્યારે રાતના સાડા આઠ-નવ વાગ્યા હતાં પણ અહિંના સાડા-પાંચ છ થયા હોય એટલું અજવાળું હતું! મને ઘડિયાળ માં જોતા ઘણી નવાઈ લાગતી હતી! આ અનુભવ મારા માટે તદ્દન નોખો હતો!
ફ્રેન્ચ ક્રાંતિના સો વર્ષની ઉજવણી કરવા ગુસ્ટેવ એફીલ નામના ઇજનેર દ્વારા બંધાવાયેલા, દુનિયાનાં સૌથી ઉંચા સ્થંભો અને મકાનોમાં અગ્ર સ્થાન ધરાવતાં એફીલ ટાવર એફીલ ટાવરનું ઐતિહાસિક મહત્વ અને અદકેરૂં આકર્ષણ છે.તેમાં લિફ્ટ દ્વારા ટોચ સુધી જવાની સગવડ છે. આ ટાવરમાં ઉંચાઈ પ્રમાણે સ્ટોપ્સ બનાવ્યાં છે. પ્રથમ સ્ટોપ સુધી જવાની ટિકીટ ૧૧ યુરો. બીજા ટોચ સુધી જવાના સ્ટોપની ટિકીટ ૧૭ યુરો.આ યુરોનું ગણિત આપણને ભારતીયોને થોડું આકરું લાગે! એક યુરોના લગભગ પંચોતેર રૂપિયા લેખે સત્તર યુરો એટલે  પોણા તેરસો રૂપિયા થાય! પણ વિદેશ કંઈ વારંવાર થોડા જતા હોઇએ?એટલે એ યુરો માંથી ભારતીય રૂપિયાનું કન્વર્ઝન મનમાં સતત ચાલતું હોવા છતાં તેના પર ઝાઝું ધ્યાન આપ્યાં વિના કતારમાં જુદા જુદા દેશનાં પર્યટકો વચ્ચે ઘણાં ભારતીય ચહેરાં પણ દેખતા દેખતા એફીલ ટાવરની ટોચ સુધી જવાની અને પાછા ફરવાની લિફ્ટની રીટર્ન ટિકીટ લઈ જ લીધી!
કોઈ પણ સ્ટોપ સુધી જાવ, એટલે ત્યાં ટાવરની ફરતે આખા પેરીસનો સુંદર વ્યુ મળે એવી ગેલરીની વ્યવસ્થા.સાથે ખરીદી કરવા શોપ્સ અને ખાણીપીણીની દુકાનોયે ખરી!
ટોચ પર જઈએ ત્યાંથી પેરીસ નગરીયાનો જે અદભૂત નજારો દેખાય એતો એફીલ ટાવરની ટોચ પર જાવ તો જ ખબર પડે! સુંદર ઇમારતો રંગીન બાકસ એક્બીજાની આજુબાજુ ગોઠવ્યાં હોય એવું લાગે,તો બીજી બાજુથી દેખાતી નદી અને તેમાં ફરતી બોટો રમકડાં જેવી લાગે! મેદાનો,ઉંચી નીચી ઇમારતો,નદીઓ,પુલો અને કીડી જેવા લાગતા માણસો આ બધું સાથે મળે એટલું મનોહર દ્રષ્ય સર્જે કે એફીલ ટાવરની ટોચ પરથી નીચે આવવાનું મન જ ન થાય! ત્યાં ઠંડી પણ ખુબ લાગતી હતી.
ત્યાં ટોચ પર એક શેમ્પેનની દુકાન જ્યાં લોકોની લાઈન લાગી હતી! ખાસ ત્રિકોણાકાર કોન જેવા ગ્લાસમાં મળતું શેમ્પેન લોકો પીતા પીતા ફોટા પડાવવાનું ચૂકતા નહોતા.સેલ્ફીનું તો જાણે આખા જગતમાં બધાને ઘેલું જ લાગ્યું છે! પાછા ઉતરવા માટે તો લિફ્ટની એટલી બધી લાંબી લાઈન હતી કે હું ત્રીસેક માળ જેટલા દાદરા સડસડાટ ઉતરીને જાતે જ નીચે આવી ગયો!
સાડા દસ-પોણા અગિયાર જેવો સમય થયો હતો. થોડી વાર ઉભા રહેવા ભૌમિકે જણાવ્યું અને બરાબર અગિયાર વાગે થોડે દૂર ઉભા રહી અમે એફીલ ટાવરનું જે સ્વરૂપ જોયું એ જીવન-ભર ભૂલી નહિ શકાય એવું હતું! દર કલાકે અંધારૂં થાય ત્યાર બાદ આખા એફીલટાવર પર ખાસ પ્રકારની સફેદ લાઈટ્સ ચાલુ-બંધ કરી અમુક સેકન્ડસ માટે અદભૂત નજારો પ્રવાસીઓ માટે પેશ કરાય છે. સામાન્ય પીળી નિયોન લાઈટ્સથી અંધારામાં દૂર સુધી દ્રષ્યમાન થતાં એફીલટાવર પર જ્યારે નવ-દસ-અગિયાર-બાર એમ દરેક કલાકે અમુક સેકન્ડ્સ માટેની રજત રોશનીની ઝાક ઝમાળ કરવામાં આવે ત્યારે ઘડી-બે ઘડી જે કંઈ કરતા હોઈએ એ બાજુએ મૂકી દઈ,આ અદભૂત નજારાનું આકંઠ પાન કરીએ ત્યારે અનેરી ધન્યતા અનુભવાય! આ મજા માણવા એક વાર તો પેરીસ જવું જ જોઇએ!



એફીલટાવરનું આ ઝગમગતું સ્વરૂપ આંખોમાં અને હ્રદયમાં ભરી અમે પાછા ઘેર આવ્યાં ત્યારે રાતના બારેક વાગી ગયા હતા.
બીજે દિવસે સવારે અમે સ્વિત્ઝરલેન્ડ જવા નિકળ્યાં.આઠસો કિલોમીટરનું અંતર ગાડીમાં રોડ માર્ગે કાપવાનું હતું.ભૌમિકને ગાડી ચલાવવાનો શોખ છે અને તે ખુબ સરસ ગાડી ચલાવે છે તેનો અનુભવ આ રોડટ્રીપ દરમ્યાન થયો.
હાઈવે પર એક-બે અવનવી વસ્તુ જોવા મળી.ત્યાં ઘણી જગાએ ફ્રેન્ચ યુવાન-યુવતિ હાથમાં કોઈક જગાનું નામ લખેલા બોર્ડ સાથે ઉભા રહેલા જોવા મળ્યાં.ખભે લટકાવેલી ટ્રેકીંગ પર જતા હોઇએ ત્યારે લઈ જઈએ એવી બેકપેક. નેહાએ જણાવ્યું કે તે હાઈકીંગ પર જવા ઇચ્છતાં યુવાન - યુવતિ હતાં.ભણતા હોય એટલે લિમિટેડ પોકેટમની હોય તેમાંથી ટ્રાવેલિંગનો ખર્ચ બને એટલો ઓછો થાય એ હેતુ થી તેઓ આ રીતે લિફ્ટ માંગે અને એ જ માર્ગે જનાર વટેમાર્ગુ ગાડીમાં જગા હોય તો તેમને લિફ્ટ આપે પણ ખરાં! અમારી સમાંતર ચાલી રહેલી અવનવી ડીઝાઈનની ગાડીઓ જોતા જોતા અચાનક ધ્યાન ગયું એકદમ ભંગારમાં જ કાઢી નાખવા લાયક કટાઈ ગયેલી હોય તેવી ગાડી ઉપર.આ ગાડી ચલાવી રહેલા ફ્રેન્ચ ભાઈએ જોયું કે હું અને નેહા તેની ગાડી સામે આશ્ચર્યથી જોઈ રહ્યાં છીએ કે તરત તેણે મારી સામે જીભડા કાઢ્યાં! નાના બાળકો એકબીજા સામે રમત કરતાં કાઢે એમ! અને સડસડાટ તેની ગાડી આગળ નિકળી ગઈ.





બપોરે દોઢેક વાગે ભૌમિકે ગાડી રસ્તાની એક બાજુએ લીધી.એ હતું એ.પી.આર.આર. નો રેસ્ટ એરીઆ જ્યાં રોડ માર્ગે પ્રવાસ કરી રહેલા પ્રવાસીઓ માટે ઘણી સારી સુવિધાઓ પ્રાપ્ય હતી. ફ્રાન્સમાં દરેક મોટર-વે પર આ રીતે થોડે થોડે અંતરે આવેલાં સુંદર સર્વિસ એરીઆ હોય જ્યાં ડ્રાઈવર થાક ઉતારી શકે, પ્રવાસીઓ જમવા કે આરામ કરવા થોભી શકે,બાળકો રમી શકે અને ત્યાં ટોયલેટ્સ સાથે, ફૂલછોડ ધરાવતા ગાર્ડન્સ અને કેટલાક મોટા સેન્ટરમાં તો હોટેલ, શોપીંગ તેમજ ઇંધણ ભરાવવાની સુવિધાયે ખરાં. 










મને આ સર્વિસ ખુબ ગમી. અમે જ્યાં રોકાયેલા એ સેન્ટર પર માથે છાપરું ધરાવતા બેસવાના સરસ સુશોભિત ઓટલા હતાં, જ્યાં બેઠા બેઠાં બપોરનું ભોજન લેવાની અમને ખુબ મજા પડી! આજુ બાજુ સરસ મજાનાં ફૂલ-છોડ પણ હતાં અમે નાની એવી લટાર મારી થોડા ઘણાં ફોટા પાડ્યાં અને ફ્રેશ થઈ આગળ વધ્યાં.






નેહા ફોન પર હિન્દી ગીતો ડાઉનલોડ કરી પોતે સાંભળી રહી હતી અને અમને પણ સંભળાવી રહી હતી.વચ્ચે વચ્ચે અમે સૂકો નાસ્તો કરી લેતા કે કોલ્ડ ડ્રીન્ક પી લેતા અને આ રીતે ખાસ્સો એવો રસ્તો કપાઈ ગયો.હવે સાંજ પડવા આવી હતી.અહિ તો રાત સુધી અજવાળુ પથરાયેલું જ રહે એટલે અંધારાની સમસ્યા નહોતી.હવે શરૂ થયો હતો થોડો ગ્રામીણ વિસ્તાર.અહિની નાની મોટી શેરીમાંથી ડ્રાઈવ કરીને જવાનો અનુભવ પણ ઘણો રોચક અને મજેદાર હતો.

(ક્રમશ:)

રવિવાર, 17 જુલાઈ, 2016

ફ્રાન્સ-સ્વીત્ઝર્લેન્ડની પ્રથમ વિદેશ યાત્રા (ભાગ - ર)

ફ્રાન્સ ની ફ્લાઈટ જેદ્દાહ થઈને જવાની હતી. જેદ્દાહમાં બે કલાક ના રોકાણ બાદ ફ્રાન્સની ફ્લાઈટ પકડવાની હતી. મુંબઈથી જેદ્દાહ જતી ફ્લાઈટ સારી રહી. ખુબ મોટું વિમાન હતું અને અડધું ખાલી પણ સાથેની બીજી બે બેઠકો ખાલી હતી. મેં એક ફિલ્મ જોઈ, ખાઈ પી અને થોડું સૂઈ લઈ છ કલાક પસાર કર્યાં. જેદ્દાહ માં ઉતર્યો એટલે ત્યાંના સ્થાનિક સમય સાથે મેળવવા મારી ઘડિયાળનો સમય બે કલાક પાછળ કરવો પડ્યો. જેદ્દાહમાં સુરક્ષા જાંચ થોડી વધુ આકરી હતી. લેપટોપ તો અલગ ટ્રેમાં મૂકાવ્યું જ પણ સાથે જૂતા,કાંડા ઘડિયાળ અને કમરે પહેરેલ પટ્ટો પણ કઢાવી અલગ ટ્રેમાં મૂકાવ્યો.ભાષા પણ ત્યાં અરેબિક જ બોલાતી હતી. નવાઈ તો ત્યારે લાગી જ્યારે જેદ્દાહ થી ફ્રાન્સની ફ્લાઈટમાં એર-હોસ્ટેસને વેજ ફુડ લાવવા કહ્યું ત્યારે તેને ‘વેજ’ શબ્દ નો અર્થ જ ખબર નહોતો અને નહોતી એ અંગ્રેજી સમજતી!

પણ આખરે તેણે એક વેજ મિલબોક્સ આપ્યું જે મેં સાશંક ખાધું! આ ફ્લાઈટ આખી ખીચોખીચ ભરેલી હતી. આખરે ફ્રાન્સમાં ઉતર્યો અને ઘડિયાળ વધુ એક કલાક પાછળ કરવી પડી. ભારતમાં જ્યારે સવારના દસ વાગ્યા હશે એ સમયે હું ફ્રાન્સમાં સવારે સાત વાગે ઉતર્યો. વિમાની મથક તો જો કે બધાં જ દેશોમાં સરખા જ હોય પણ બહારની વિદેશી ભૂમિ પર પ્રથમ વાર પગરણ કરવા મન આતુર બન્યું હતું! ઇમિગ્રેશન ચેક માટેની કતારમાં ઉભો હતો ત્યારે થોડો ફફડાટ હતો. કારણ એકાદ વર્ષ અગાઉ ફ્રાન્સમાં અને થોડા સમય અગાઉ બેલ્જિયમમાં થયેલા આતંકવાદી હૂમલા બાદ વિદેશી માટે આ યુરોપીય દેશોમાં પ્રવેશવું જરાક અઘરૂં બન્યું છે એમ સાંભળ્યું હતું. આખરે મારો નંબર આવ્યો અને એક અશ્વેત પોલીસ ઓફિસરે મારી સામે જોઈ પાસપોર્ટની વિગતો તેની સિસ્ટમમાં ઓનલાઈન ચેક કરી ફ્રાન્સનો થપ્પો મારી દીધો પાસપોર્ટ પર!
બેગેજ વગેરે લઈ લીધા બાદ એચ.ડી.એફ.સી. નું ડેબીટ કાર્ડ એ.ટી.એમ મશીનમાંથી વાપરી પૈસા કાઢવાનો પ્રયત્ન કર્યો. નેટબેન્કીંગમાં ઇન્ટરનેશનલ વપરાશ માટે કાર્ડ એનેબલ કર્યું હોવા છતાં અને તેમને ફોન કરીને પણ આ બાબતની ખાતરી કરી હોવા છતાં ટ્રાન્સેકશન્સ ફેલ! સારૂં હતું મારી પાસે બીજા પણ ક્રેડીટ અને ડેબીટ કાર્ડ્સ હતાં અને થોડા ઘણા યુરો મેં મુંબઈ એરપોર્ટ પરથી સાથે રાખ્યા હતાં. એચ.ડી.એફ.સી. બેન્કના ડેબીટ કાર્ડે મને બે-ત્રણ દિવસ બાદ પણ ફરી દગો આપ્યો હતો. બેલેન્સ ચેક કર્યું હતું તેનો ટ્રાન્સેકશન ચાર્જ તેમણે વસૂલ્યો પણ બે-ત્રણ વાર તેમના કાર્ડે મારા ટ્રાન્સેકશન્સ ફેલ કર્યા તેનું કંઈ નહિ!
મારી કઝીન નેહાનો પતિ ભૌમિક મને એરપોર્ટ પર લેવા આવ્યો હતો. તેની સાથે અન્ડરગ્રાઉન્ડ પાર્કીંગ લોટમાં જઈ ગાડીમાં બેઠા અને એરપોર્ટની બહાર નિકળી હાઈવે પર આવ્યાં. એરપોર્ટમાંથી બહાર નિકળવાનો સર્પિલાકાર માર્ગ મજાનો હતો. હાઈવે તો ખેર મને મુંબઈના હાઈવે જેવો જ જણાઈ રહ્યો હતો. પણ માર્ગની બંને બાજુએ લીલોતરી સારા એવા પ્રમાણમાં દેખા દેતી હતી. કોઈક કોઈક છોડને તો લાલ ચટ્ટક અને પીળા નાજુક અને અતિ સુંદર એવા ફૂલ પણ ભરચક આવેલા દેખાતા હતાં. વિદેશી ફુલો! જે અગાઉ ભારતમાં ક્યારેય જોયા નહોતા!
ખેર થોડું અંતર કાપ્યા બાદ જ્યારે મુખ્ય પેરીસ શહેર નજીક આવ્યાં કે ટ્રાફીકની સમસ્યા શરૂ! અહિં પણ ટ્રાફીક ની સમસ્યા તો મુંબઈ અને ભારતના દરેક મહાનગર જેટલી જ ગંભીર અને વકરેલી જોવા મળી! ભૌમિકે જણાવ્યું કે ઓફિસ કલાકો દરમ્યાન ટ્રાફીક ની સમસ્યા રોજની હતી. તેને એટલું મોડું થઈ ગયું કે આખરે અનિચ્છાએ તેણે મને બીજી ટેક્સીમાં બેસાડી ઓફિસ પહોંચી જવું પડ્યું. ટેક્સી વાળાને અંગ્રેજી આવડતું નહોતું પણ ભૌમિકે તેને ફ્રેન્ચમાં પોતાનું સરનામું સમજાવી દીધેલું એટલે ખાસ કોઈ તકલીફ પડી નહિ.મારી કઝીન નેહા અમારી વાટ જોતી તૈયાર જ ઉભી હતી અને તેણે મારું ઉષ્માભર્યું સ્વાગત કર્યું! આખરે પહેલવહેલું તેના પિયર પક્ષનું  કોઈક તેના સાસરાની ભૂમિ પર તેને મળવા આવ્યું હતું!
અહિ લોકોના જીવનના દરેક પાસામાં ટેકનોલોજી અભિન્ન અંગની જેમ વણાઈ ગયેલી જોવા મળે.
નેહાએ બિલ્ડીંગના ગેટ બહાર એક મશીનમાં પાસવર્ડ કોડ નાખ્યો અને ગેટ ખુલી ગયો ત્યારબાદ તેના બિલ્ડીંગની અંદર લિફ્ટ પાસે જવા બીજા એક ગેટમાં કોડ નાખતા અંદર પ્રવેશ મળ્યો અને છેવટે લિફ્ટ માં ત્રીજો એક સુરક્ષા કવચ ભેદ્યો ત્યારે એન્ટ્રી મળી!
નેહા અને ભૌમિકનું સ્વચ્છ સુઘડ ઘર જોઈ તેમના પર માન થઈ આવ્યું. ખુબ સરળ પણ સારી રીતે તેમણે તેમના ઘરને સજાવ્યું હતું. બિલાન કોર્ટ નામનો આ વિસ્તાર અગાઉ રજવાડાનો ભાગ હતો. ચોખ્ખાઈ અહિ ઉડીને આંખે વળગે એવી હતી. લંબચોરસ આકારમાં ગોઠવાયેલા મકાનો હારમાં હતાં પણ બે હાર વચ્ચે ખાસ્સી એવી જગા હતી જેમાં બગીચો અને એક છેડે નાનકડું કૃત્રિમ તળાવ જેવું બનાવેલું હતું. આખા રસ્તે અને અહિં પાર્કમાં મને સતત ઝાડછોડને મેઇનટેન કરતી ગાડીઓ જોવા મળી. દરેક બાબતનું અહિ અતિ ચોકસાઈ પૂર્વક જતન થતું જોવા મળ્યું. માર્ગમાં જોગિંગ કે રનીંગ કરી રહેલા લોકો તો જોવા મળ્યા જ હતાં પણ નેહા ના ઘરની વિશાળ લાંબી ગેલેરીમાંથી સામે નીચે દ્રષ્યમાન થતા વિશાળ બગીચામાં માત્ર એક મહિલા કસરત કરી રહેલી જોવા મળી.અને સાથે તેને કસરત કરાવી રહેલો તેનો પ્રશિક્ષક. મોટા લાંબા બગીચામાં આ બે જણ સિવાય મેઇનટેનન્સની ગાડીમાં બેસી ઘાસ ટ્રીમ કરી રહેલ વ્યક્તિ અને થોડા બતકો સિવાય બીજું કોઈ નહિ! અહિ મને ખુબ મોકળાશ વર્તાતી હતી. ભારત કે મુંબઈની જેમ કીડીયારામાં ઉભરાતી કીડીઓની જેમ ભટકાતા માણસો અહિ નહોતા! હતાં એ લોકો ખુબ વ્યવસ્થિત, ટાપટીપ કરેલા અને પોતાની મસ્તીમાં મસ્ત જણાતા હતાં. અને બધાં જ સુંદર! રસ્તે મજૂરી કરતાં સફાઈ કામદારો કે મજૂરો પણ ભારતના ફિલ્મી હીરોને ટક્કર મારે એટલા હેન્ડસમ અને યુવતિઓ તો ઠીક પણ વૃદ્ધાઓ પણ સરસ મજાના ઓવરકોટમાં સજ્જ - હળવા મેક અપ સાથે!
ઘર અને ઘર બહારના દ્રષ્યને મન ભરી માણ્યા બાદ હું નેહા સાથે તેના કિચનમાં બેઠો. ગરમાગરમ ચા સાથે ભારતથી લઈ ગયેલ થેપલાની લિજ્જત માણતા માણતા અમે બંને ભાઈ-બહેને ધરાઈને વાતો કરી! પછી ધરાઈને ખાધું યે ખરા! નેહાનું કીચન ટેક્નોલોજીમય હતું ઈલેક્ટ્રીક સ્ટવ થી માંડી વાસણ ધોવાનું ડીશ વોશર પણ ઈલેક્ટ્રોનીક! ફ્રિજ પર તે ભૌમિક સાથે જે જે દેશોમાં ફરી હતી ત્યાંના સોવેનિયર ફ્રીજ મેગ્નેટ લગાડ્યા હતાં જે જોઈ મને પણ એમ કરવાની પ્રેરણા પ્રાપ્ત થઈ! તેઓ સવારે ઉઠતા વેંત ઈલેક્ટ્રીક બ્રશથી દાંત સાફ કરે અને હેન્ડ શાવરથી સ્નાન કરે. કપડા ધોવાનું પણ મશીન અને વાઈ-ફાઈ ઇન્ટરનેટ વગર તો જાણે ત્યાં પાંગળા થઈ જવાય! ત્યાંના લોકો રસ્તો શોધવા જી.પી.એસ.થી માંડી મનોરંજન માટે પણ ટીવી.કે ફિલ્મો જોવા ઇન્ટર નેટનો ભરપૂર ઉપયોગ કરે છે.
બપોરે આરામ કર્યા બાદ અમે ત્યાંની અન્ડરગ્રાઉન્ડ મેટ્રો ટ્રેનમાં બેસી ભારતના દિલ્હી ગેટ કે ગેટ-વે-ઓફ-ઇન્ડિયા જેવા એક મોટા સૈનિક-સ્મારકની મુલાકાતે ગયાં જેનું નામ હતું 'આર્ક દ ટ્રાયમ્ફ'.
અતિ ભવ્ય એવું આ સ્મારક પ્રાચીન યુદ્ધમાં શહીદ થયેલાં ફ્રેન્ચ સૈનિકોને અંજલિ આપે છે.આ સ્મારકની ફરતે ગોળાકારે બાર રસ્તા અલગ અલગ દિશાઓમાં જુદા જુદા દેશો તરફ જય છે.એક રસ્તો ભારત તરફ પણ આવે છે એમ મને નેહાએ જણાવ્યું.અહિં જુદાજુદા દેશનાં અનેક લોકો પ્રવાસે આવેલા જોવા મળ્યાં.સુંદર સાંજ હતી.મેટ્રો સ્ટેશનેથી સ્મારક સુધી લઈ આવતી ફૂટપાથ ફિલ્મોમાં જોવા મલતી પરદેશની છબીને આબેહૂબ મળતઈ આવતી હતી.પેરીસની વિશેષતાઓમાંની એક છે અહિંની સ્ટાઈલીશ કાર.બે જ જણ બેસી શકે એવી મોટા ભાગની ગાડીઓ ખુબ આકર્ષક એવી અને મોટા પ્રમાણમાં ઠેર ઠેર દેખાય!ઘણાં સ્ટોરનાં નામ આપણને ઉચ્ચારમાં મુશ્કેલી એવા હતાં પણ ઘણાં સ્ટોર્સ એવા પણ હતાં જે વૈશ્વિકરણને પગલે અહિં ભારતમાં મોટા શહેરોમાં મોલ્સમાં પણ જોવા મળે છે.
સાંજે ભૌમિક પણ ઓફિસેથી સીધો અમારી સાથે જોડાયો અને અમે પેરીસની ઓળખ સમા એફીલ ટાવર ગયાં.

Please see more pics for this post by clicking Here    

(ક્રમશ:)

ફ્રાન્સ-સ્વીત્ઝર્લેન્ડની પ્રથમ વિદેશ યાત્રા (ભાગ - ૧)

અત્યાર સુધી ઘણા પ્રવાસ લેખ લખ્યાં બ્લોગમાં.વિદેશ પ્રવાસના લેખો માત્ર વાંચ્યા હતાં કારણ વિદેશ જવાનું સૌભાગ્ય પ્રાપ્ત થયું નહોતું!આખો એક પાસપોર્ટ કોરો કોરો એક્સપાયર થઈ ગયેલો ૨૦૧૧માં!એટલે નિર્ધાર કરેલો પાસપોર્ટ રીન્યુ કરાવતી વખતે કે હવે નવા પાસપોર્ટમાં તો વિદેશી વિઝા નો થપ્પો લઈને જંપીશ! સદનસીબે ઇશ્વરે ઇચ્છા ફળીભૂત કરી! મે મહિનામાં મેં મારો પ્રથમ વિદેશ પ્રવાસ ખેડ્યો - ફ્રાન્સ અને સ્વિતઝરલેન્ડ માં. દરેક પ્રથમ વસ્તુઓનું જીવનમાં નોખું અને વિશેષ મહત્વ રહેતું હોય છે! કારણથી પણ પ્રવાસ માત્ર સાત-આઠ દિવસની ટૂંકી અવધિનો હોવા છતાં અવિસ્મરણીય બની રહ્યો. તેના વિશે વાત કરીશ હવે પછીના બે-ત્રણ સપ્તાહ સુધી બ્લોગ થકી.
પ્રથમ વાર પરદેશની ભૂમિ પર પગ મૂકવાનો હતો અને પ્રથમ વિદેશ પ્રવાસ વિશેષ પણ હોવો જોઇએ આશયથી ફ્રાન્સ પર પસંદગી ઉતારી. ત્યાં મારી પિત્રાઈ બહેન નેહા રહે છે. તેના દોઢેક વર્ષ અગાઉ ભૌમિક સાથે લગ્ન થયા છે અને તેઓ બંને ત્યાં પેરીસ ખાતે સ્થાયી થયાં છે. વિશ્વના સૌથી સુંદર અને અન્ય અનેક લાક્ષણિકતાઓ ધરાવતા સ્વિતઝરલેન્ડનું આકર્ષણ ભાગ્યે કોઈ ને નહિ હોય! નેહા-ભૌમિક પણ ત્યાં અત્યાર સુધી ગયા નહોતા એટલે ત્યાં જવાનો પણ અમે વિચાર કર્યો. સાત-આઠ દિવસમાં હજી વધુ દેશોનો સમાવેશ શક્ય નહોતો નહિતર મેં તો હજી બીજા બે-ત્રણ ખાસ દેશો મુલાકાત લેવાના દેશોની યાદીમાં ઉમેરી દીધા હોત! ખુબ વધુ ફર ફર કરવાની જગાએ એક ચોક્કસ જગાની લિજ્જત વધુ સારી રીતે માણવામાં વધુ ડહાપણ છે. ચાર દિવસ ફ્રાન્સ અને ત્રણ દિવસ સ્વિતઝરલેન્ડ એમ નક્કી થયું. ભૌમિક આઠસો-એક કિલોમીટરનું અંતર ડ્રાઈવ કરી ફ્રાન્સ-પેરીસથી સ્વિતઝરલેન્ડ લઈ જવાનો હતો. એમાં પણ આવવા જવાના અઢારેક કલાક ગણી લેવાના.એટલે મેં બે દેશોનો જ  પ્રવાસ કરવાનું નક્કી કરી મન મનાવ્યું!
વિદેશ પ્રવાસની તૈયારી જેટલી જલ્દી કરો એટલું વધુ સારું. કારણ અહિ અનેક ફોર્માલીટીસ કરવી પડતી હોય છે જે સ્થાનિક-દેશની અંદરના પ્રવાસ કરતા જુદી અને થોડી જટીલ પણ હોય છે. તમે જેટલું એડવાન્સ પ્લાનિંગ કરો એટલો ફાયદો પણ વધુ થાય. હવાઈ મુસાફરી, હોટલ કે હોમસ્ટે ના દર વગેરે બધામાં નાણાંની બચત થાય. મેં ત્રણ મહિના અગાઉ ફેબ્રુઆરીમાં સાઉદી અરેબિયન એરલાઈન્સની રીટર્ન ટિકીટ બુક કરી લીધી. જલ્દી બુકિંગ કરવાને લીધે ટિકીટ ઘણાં સસ્તામાં પડી.
તમે ફ્રાન્સમાં જાવ એટલે વિઝા જોઇએ. ફ્રાન્સ શેનઝેન યુરોપીય દેશના જૂથમાં નો એક હોવાથી ત્યાં જવા શેનઝેન વિઝા માટે અપ્લાય કરવું પડે. કોમન વિઝા બેલ્જિયમ, ઇટલી, જર્મની, પોર્ટુગલ, ડેન્માર્ક, સ્વિત્ઝરલેન્ડ, સ્વીડન, પોલેન્ડ, ફિનલેન્ડ  વગેરે ૨૬ દેશમાં ચાલે. આમાંના કોઈ પણ દેશની મુલાકાતે જવા શેનઝેન વિઝા માટે અપ્લાય કરવું પડે અને એક વાર વિઝા મળ્યા પછી તમે જૂથમાં ના કોઈ પણ દેશમાં પ્રવાસ કરી શકો.પણ યુરોપમાં ના લંડન કે અન્ય કોઈ દેશ જે શેન્જેન જૂથનો સમૂહ હોય તેના માટે અલગ વિઝા અપ્લાય કરવા પડે. જો કે વિઝા માટે અપ્લાય કરવાની અને પછીની સંપૂર્ણ પ્રક્રિયા ઓનલાઈન તેમજ તમારી રુબરુ એકાદ-બે ફરજીયાત મુલાકાત સાથે સંપન્ન થઈ જાય. અહિં બાકીની ભારતીય સરકારી પ્રક્રિયાઓ જેવું ખાતું જોવા મળે.વિદેશ સાથે જોડાયેલી બધી બાબતો કેમ સારી અને ચડીયાતી હશે? મને આશા છે પ્રધાનમંત્રી મોદી સાહેબનું ભારતને ઉત્ક્રુષ્ટ રાષ્ટ્ર બનાવવાનું સ્વપ્ન જલ્દી પરિપૂર્ણ થાય
ફ્રાન્સમાં જવું હોય તો તમારે ત્યાંના કોઈ રહેવાસી જે તમારા સગા-કે-મિત્ર હોય તેની પાસેથી ત્યાંના અધિકારી સૂત્રો દ્વારા માન્યતા પ્રાપ્ત ઓથોરીટી લેટર મેળવવો પડે જેમાં તમને પોતાના ઘરમાં તમારા ત્યાંના સંપૂર્ણ રોકાણ દરમ્યાન રહેઠાણ પૂરું પાડવાના છે એની બાહેંધરી હોય અથવા તમારે ફ્લાઈટની રીટર્ન ટિકીટ હોય એટલા પૂરા સમય સુધીની હોટલ બુકીંગની સાબિતી આપવી પડે અને સાથે સંપૂર્ણ આઇટીનેરરી એટલે કે આખું સમયપત્રક જે જણાવે કે તમે ક્યાંથી ક્યાં જવાના છો વગેરે પણ આપવા પડે. તમારા એમ્પ્લોયર પાસેથી તમે પાછા ચોક્કસ તારીખે નોકરીએ જોડાવાના છો અને તમારી સમય દરમ્યાનની રજા તેણે મંજૂર કરી છે દર્શાવતો પત્ર પણ તમારે આપવો પડે. સાથે તમારા ત્રણેક મહિનાનું બેન્ક સ્ટેટમેન્ટ,પાછલા ત્રણ વર્ષની આયકર રીટર્ન ફાઈલ કર્યાની સાબિતી તેમજ તમે શામાટે જઈ રહ્યા છો તેની વિગત સાથેની જે-તે દેશના કોન્સ્યુલેટને સંબોધીને લખેલી અરજી આટલી બધી વિગતો પૂરી પાડો ત્યારે તમને વિઝા મળે.
મેં વિઝા માટે જરૂરી બધાં દસ્તાવેજો બરાબર આપ્યાં હતાં એટલે જે દિવસે વિઝા અપ્લિકેશન સુપ્રત કરી એના બીજે દિવસે વિઝા મળી ગયાં.
સારા કામમાં સો વિઘ્નો આવે એવી આપણામાં કહેવત છે.મારા,મારી પત્ની અમીના અને પુત્રી નમ્યાનાં ટિકીટ,વિઝા વગરે ખાસ્સી મહેનત કરી મેળવ્યાં બાદ સારૂં એવું પ્લાનીંગ પણ કર્યું હતું જવાનું પણ છેલ્લી ઘડીએ અમીની તબિયત નાદુરસ્ત થઈ જવાને કારણે આખો પ્લાન પડતો મૂકવાનો વિચાર કર્યો ત્યારે અમી જ આગ્રહ કર્યો કે મારે વિદેશ જવાનો પ્લાન કેન્સલ ન કરવો. નમ્યાને લઈ જવાની મારી ઇચ્છા હતી પણ આટલે દૂર તેની માતા વગર તેને લઈ જવ માટે ઘરનાં અન્ય સભ્યોએ પણ મના ફરમાવી અને હું એકલો રવાના થયો ફ્રાન્સ-સ્વીત્ઝર્લેન્ડની યાત્રાએ - મારા પ્રથમ વિદેશ પ્રવાસે!
આંતરદેશીય હવાઈમથકે ત્રણ કલાક પહેલા પહોંચી ગયો જે જરૂરી હતું. 
 

મેં બર્મ્યુડા પહેર્યો હતો અને ફ્રાન્સની મારી ફ્લાઈટ જેદ્દાહ થઈને જવાની હતી.સારું થયું કે લગેજ ચેક ઇન કરાવતી વખતે સાઉદી અરેબિયન સ્ટાફની યુવતિની નજર મારા પર પડી અને તેણે કહ્યું જેદ્દાહ કે રીયાધમાં બર્મ્યુડા કે થ્રી-ફોર્થ માન્ય નથી.મેં તરત ફુલ લેન્થ પેન્ટ પહેરી લીધું!
થોડા ઘણાં ભારતીય નાણાંને ફ્રાન્સ કરન્સીમાં કન્વર્ટ કરી ફ્રાન્સ યુરોની રકમ સાથે લીધી.હવાઈ મથકો પર આ માટે તમારે ખાસ્સી વધુ ફી ચૂકવવી પડે આથી સલાહ ભર્યું છે કે તમે પહેલેથી વિદેશની કરન્સીની વ્યવસ્થા અન્ય માન્યતાપ્રાપ્ત જગાએથી કરી લીધી હોય.તમારા ઇન્ટરનેશનલ ક્રેડીટ કે ડેબીટ કાર્ડને પણ ઇન્ટરનેશનલ ટ્રાન્સેકશન્સ માટે એનેબલ કરાવવું પડે એ જરૂરી અને ઉપયોગી સાબિત થાય એવું છે.
 સ્થાનિક હવાઈ પ્રવાસ માટે ન કરવી પડે પણ વિદેશપ્રવાસ માટે ફરજિયાત અને અતિ અગત્યની ફોર્માલીટી એટલે ઇમીગ્રેશન ચેક. જુદી જુદી જાતિના,જુદા જુદા દેશોની રાષ્ટ્રીયતા ધરાવતી લોકોની એક લાંબી કતાર એટલે આ ઇમીગ્રેશન ચેક માટેની લાઈન.એમાંજ તમારો દોઢેક કલાક નિકળી જાય પછી તમે દેશમાં પ્રવેશી રહ્યાં હોવ કે દેશ છોડીને જઈ રહ્યાં હોય એમ બંને વખતે અને જે દેશ છોડો તેમાં પણ અને જે દેશમાં પ્રવેશો તેમાં પણ તમારે આ એક અતિ અગત્યની પ્રક્રિયામાંથી પસાર થવું જ પડે.અને ભારત હોય કે વિદેશ બધે આ પ્રક્રિયા લગભગ એક સમાન. ફ્રાન્સમાં મને માત્ર એક ફરક જોવા મળ્યો. ફ્રાન્સમાં ત્યાંના સ્થાનિક રહેવાસીઓ માટે અલાયદી કતાર હતી જેમાં ફ્રાન્સનાં નાગરીકોને ઓછો સમય લાગે. ભારતમાં આવી કોઈ વિશેષ સુવિધા પોતાના નાગરીકો માટે ન હોવાથી વિદેશ પ્રવાસેથી પરત થતી વેળાએ પણ ઇમીગ્રેશનની લાંબી કતારમાં ઉભા રહેવું થોડું અકળામણ ભર્યું બની રહે.

આખરે બધી ફોર્માલીટીઝ પતાવી ફ્લાઈટમાં અનેરા ઉત્સાહ સાથે બેઠો અને શરૂ થઈ મારી પ્રથમ વિદેશ યાત્રા.


(ક્રમશ:)